Автоматічні тітулкы по-украйинськы зафунґовали у YouTube

Нова опція была запущена без даякого голосного анонса.

Фірма Google старат ся оптімізовати тай адаптовати свої продукты на широку авдиторію, людьом из спеціалными потребами. Єднов из такых функцій є автоматічноє формованя тітулок на відео в YouTube. Платформа валовшна зґенеровати тітулкы на відео упознавучи саму бисїду у відеови, тай у окремых трафункох може йих товмачити. Ипен типирька у YouTube появили ся автоматічні тітулкы по-украйинськы, хоть за исе ниґде ся силно не голосило.

Функцію ненароком запримітили самі хосновачі, кукавучи YouTube Live Caption. Уже робочоє, можете самі побзерати, кидь найдете відео другым языком (наприклад анґліцькым) тай уключити автоматічні тітулкы по-украйинськы.

Сама технолоґія упознаваня бисїды щи далеко не ідеална, та по текстови годни проскаковати ґанджі. Кваліта резултувучых тітулок буде щи читаво залежати на самоє відео, як шіковно ся бисїдує, якый добрый звук. У самому YouTube за тото тоже варувут:

Технолоґія автоматічного упознаваня бисїды из часом ся злїпшує, тай сяка матарґа автоматічных тітулок тоже ся злїпшит.

Сяка матарґа уже давно фунґує на другых языках, на котрых ся творит бӯлше контента. Наприклад кидь чините відеа на анґліцьку авдиторію, та можете ани не переживати за написованя тітулок, YouTube тото сам напарує доста файно, можете хыба лиш зконтроловати на даякі дрӯбні хыбы.

Из языками меншиновыми раз не так всьо добрі: упознаваня русинської бисїды на YouTube чекати щи ачий довго. Хоть фірма Google уже робила крокы у бока ид нашому языкови, гикой руснацька розкладна клавешници Google Keyboard.

Жерело: