> ## Content Index > Fetch the complete content index at: https://interfyisa.com/llms.txt > Use this file to discover other available public pages before exploring further. # Minecraft по-русинськы — додано офіціалноє товмачіня - URL: https://interfyisa.com/minecraft-po-rusinsky/ - Published: 2022-10-28T09:10:48.000Z - Updated: 2022-10-28T10:30:41.000Z - Description: Перва у історії бавка де си можете уключити інтерфейс по-нашому! - Author: Мигаль Лыжечко - Tags: Новості У сисю середу, 26\. Октовбра, популарна у світови бавка дӯстала офіціалноє товмачіня по-руснацькы. Исе, кажеме нараз, історичный момент, бо исе первый трафунок, коли можете си у игрї уключити нашу бисїду такой нараз у штімованьох, без додаточных маніпулацій у кодови. Легко, єднов ґомбов. Не перві сьме туй у провбі вам за тото розказати, уже сьме могли читати за исю новину на [Rueportal](https://rueportal.eu/blog/minecraft-po-rusnacky/?ref=interfyisa.com) авадь [lem.fm](https://www.lem.fm/minecraft-mozh-baviti-uzh-i-po-rusinsky/?ref=interfyisa.com). ![](https://interfyisa.com/content/images/2022/10/Screenshot_20.jpg) Уключіт си нашу бисїду у штімованьох Над сим товмачіньом робила цїла команда люди, но ініціатором быв закладатель проєкта Rueportal – Юрко Капац, котрый контактовав розробникӯв Minecraft щи у рокови 2019, но не здав ся, кой його жаданя пару раз были проіґноровані, ай дотручав дїло до лоґічного кӯнця. Мали сьме час тай дяку из Юрком за тото показковати: **1\. Як домак взникла ідея товмачити майнкрафт по-русинськы?** *Кой чилядник має товмаченя ги гобі, та фурт си думат, што бы мож потовмачити, а потовмачити даяку бавку по руснацькы-м мав дяку уже давно. Днишнї дїти май часто бавкы бавлят ги книгы читавут, а я ся фурт стараву нашу бисїду шырити главно межи молоджавов, котра доста часто уже не знає порядочно по нашому бисїдовати. Та туйкы не требало довго думати...* 🙂 **2\. Чом ипен майнкрафт? Ци контактовав ись авторӯв даякых другых бавок?** *Minecraft им дїтваком даякый час бавив и сам, айбо пак им ся того лишив. Доста довго-м за тоту бавку нич не чув, аж пак кой им быв на навщиві у файты, та-м увидїв, ож минші Minecraft фурт бавлят, сидят у тому цїлыми днями. Тогды-м порозумів, ож ися бавка з нами навхтема, мінять ся лем чилядь, котра ю бавит. Иппен тогды-м си и подумав, ож як файно бы было, кибы наша чилядь дерева рубала фийсов, а не топором авадь сокирою - скурта, кибы тота бавка была по нашому а дїти бавлинём такой привыкали д нашуй бисїдї тай заінтересововали ся нёв.* *Сяк потихы-м зачав быв глядати способы, як тото реалізовати. Мило-м ся зачудовав, кой им увидїв, ож Minecraft хоснує платформу Crowdin, котра была розроблена якраз на то, бы дати можность доброволникам помочи из товмаченём проєктув на рузні языкы. Пирві звіданкы а просиня шак резултатув не дали а ідея ся удклала у фійовку з цидулов «май пак».* *Кунцём року-м доста трафом увидїв, ож у них ся там у бавцї поміняли локалізачні менеджеры, та-м попровбовав написати наново. Пусля куртої бисїды сьме дустали добро тай пустили сьме ся до товмаченя.* *А за другі бавкы-м не дуже и думав, бо хотїв им иппен банёмайстрованя.* **3\. Як уже было договорено, та што было май-май тяжкым у процесови ипен товмачіня? Як было из неолоґізмами?** *Ачий вшыткі знаєме, яка сітуація з нашов бисїдов на Пудкарпатю: єдного стандарда не є, діалекты сут жыві тай пестрі, ясно, ож вшыткым не трафиме у дяку. А тым булше у Minecraft'ови, де є рузна серсама — чеканы, фийсы, лопаты, копачкы — на котру у нас маєме вшелиякі назывкы. Старав им ся держати ся прінціпув описаных у писемници русинського языка «Материнськый язык» 1999, котрі-м шак мало пудправив пуд себе тай провбовав им даяк слїдити а контроловати товмаченя колеґув (бо бавку-м не товмачив сам), убы сьме всокотили консістентность а сістемность.* *Што ся кыват неолоґізмув, та было доста легко, бо не дуже повно їх там и є. Сут там предметы, котрі товмачити неслобудно, тогды сьме хосновали транскріпцію. Даяк май інтересно сьме провбовали называти створ из бавкы, брали сьме даякоє слово, котроє паровало д оріґіналови и чинили сьме нові назывникы з помучов тіповых про наш язык суфіксув а концёвок. Ги примір мож привести слово-назывку «Иношко» (Allay у оріґіналї) — блага створа, котра знає бавлячови носити дарункы. Туйкы сьме узяли нашоє слово «инош», котроє значит «слуга» тай додали сьме д нёму суфікс -ко, котрым у нас часто творят назывникы з любости (Иван - Иванко, Висиль - Васько), вєдно з тым ся з того став и такый референс на Ийзушка, котрый тоже людём носит дарункы, докус таги наш иношко у бавцї* 🙂 **4\. Што из тым дале? Коли увидиме Windows по-русинськы? (туй ясно ож фіґлює ся)** *Буду радый, кидь холем єден чилядник ся заінтересує своёв руднов културов позад бавленя Minecraft'а по нашому.* *Айбо што буде дале нико не знає, хотїло бы ся, убы Minecraft ся не убстав первов тай послїднёв бавков, котра має руснацьку бисїду. А дале даякі далші ідеї маву, айбо щи дуже скоро за тото дашто казати, бо там раз нич не ясно.* *Хотїв бы-м глядати дашто, што принесе хосен нашуй обчинї. Притум и Minecraft є бавка, котра фурт дустає нові убновленя, а тоты треба тоже товмачити. Діґіталный світ про руснацькых товмачув ся убстає неораным полём, роботы є преповно, быв бы час тай світ! А кидь буде щи й можность, та бізувно будут и Оболокы по нашому!* *На кониць бы-м щи хотїв уповісти, ож кидь исе буде читати дако, ко має дяку ся даяк прикапчати д нашому товмачському тімови, та давайте знати, мы ся не кусаєме* 🙂 ![](https://interfyisa.com/content/images/2022/10/Screenshot_21.jpg)