Фірма Valve заставит забрати из указкового образчика бавкы інформацію за рейтінґы
Тота зміна стане платна из зачатку сектембра.
Фірма Valve читаво змінит сам приступ указованя елементӯв у бовтови бавок Steam. Зачинавучи уд сектембра, головні образчикы товара (бавкы) мусят мати сугубо указковоє зображеня контента у самӯв бавцї, назывку тої бавкы, тай офіціалні тітулкы. Но не мож буде класти на тоты образчикы обзираня, рӯзні досягнутя, знижкы, авадь текст, што рекламує другый продукт.
Дакотрым розробникам бавок тото буде читавый проблем, бо они силно сут залежні на подобну інформацію, обы мати шансу быти запримічеными йих потенціалнов авдіторійов у веліканськӯв грудї бавок из єдної катеґорії у Steam.
Туй але што за исе кажут у Valve:
Нашым головным цїльом є зробити так, жебы куповач бавок мӯг узяти си дашто кым май просто тай шіковно, та супокӯйно си забавити выбрану бавку. Но недавно сьме запримітили смутну тенденцію, ож розробникы бавок яли давати премного шелиякых рейтинґув, текста, тай обзирань на головный образчик бавкы в каталоґови. Туй нам стало розумливо, ож правидла нашого бовта были може не доста ясні. Спозад того, ож уміст головного образчика бавкы не быв ниґда котролованый, та выросло из нього дашто такоє, што аж нияк не помагат чиляди тоту бавку купити.
На дакотрых бавках, як сьме запримітили, сякого контента на образчиках было так много, ож тяжко было розпозерати ба як ся тота бавка домак кличе, якоє їв є лоґо. Подакотрі образчикы мали зафіксовано рейтінґы, котрі сут уже не платні. Но тай, на кониць, ушыткі текстові блокы на бавках были лишек по-анґліцькы, што читаво ізолує бавлячӯв, што по-анґліцькы не говорят.
Дале до того, Valve кажут, ож на рейтінґы, обзираня, а такоє, та бовт має спеціалні поля, у котрі тоту інформацію за вашу бавку можете укласти. Хоть ясно, ож тото не увидите, закидь просто листаєте бавкы у каталоґови.
Фірма Valve не блокує текст на образчиках, не цїлком. Буде поволено мати назывку бавкы, даякый тітулок на тото, тай, гикой было указано на прикладови у них у блоґови, мож выхосновати текст, де ся розказує за новый контент у бавци. При тӯм додаточні тексты мусят быти локалізовані на вшыткі языкы, котрыми є потовмачена ай сама бавка. За тото май детайлно можете почитати у документови уд Valve.
Jay Peters
Коментарї () • Правила коментованя