Інтерфийса: Убрані статї 2024

Аж єсьте трафили на йсю сторунку, та майскорї інтересно вам, што вто за книга „Інтерфийса: Убрані статї 2024“, за што у нюв ся пише тай як ї мож дустати.

Што вто є?

Ися книжочка обсягує статі, написані у гатарах проєкта Інтерфийса двома авторами: Мигальом Лыжечком тай Петром Біровом. Тематика така, як и в нашого вебсайта: популарна наука, технолоґії, техніка тай усьо, што з нима скапчано. Наприклад, из текстув узнаєте за вто, як из часом ся міняло представленя нашої наукы за діносаврув; якый прінтер вам буде майліпше паровати залежно на ваші потребы тай ситуацію; чого ChatGPT не приказує добрі по-нашому и так дале.

Удну є 15 статий, а тираж книгы — 300 дарабув.

Книжка была выдана на зачаткови 2025. року тай уддає ся за донат на фонд „Рух підтримки закарпатських військових“ у розмірі выд 300 украйинськых гривнюв (UAH) из указаньом скріншота з донатом авадь другого способа пудтвердженя оплаты.

Сут ищи книгы?

Айно, щи їх маєме!

Кидь хочете дустати книгу — реґіструйте ся у сюв формі. Датко з Інтерфийсы зконтактує вас, обы прокомуніковати, як платити тай куды заганяти.

Правда, ож исі статі уже сут на сайтови?

Кидь тото не было ясно из інформації высше, та вартує уточнити: книга обсягує статі, котрі сперед тым уже были опубліковані у нас на сайтови. У папірьовув зберьці найдете и три публикації, котрі дочасно сут ексклузівными у папірьови, тай щи ниґде ся сперед того не указовали.

Ися книга є нечастым трафунком, коли публікації из веба адаптововали ся на папірь, а не наспак.

А нашто исе тогды?

Папірьова зберька публикацій нашого проєкту мала за собов даяку комбіновану ціль, зкурта:

• Побзерати, ци людьом доста інтересна література сякого филя, обы дати за неї гроші. Моментално література по-русинськы жиє поза фінансовыми транзакціями, кой бульша частина тиражу просто дарує ся цімборам. Хотіли сьме побзерати, ци є у шорового читача домак інтерес куповати сякый филь читаня;
• Потенційно донести наші тексты до тых читачув, котрым май комфортно читати у папірьови, ги з екрана;
• Мати даяку фізичну памнятку за проєкт. Мож раховати исе подарком на четветрый гуд проєкта як читачам, так и всьым, тко ся трудит над Інтерфийсов.