Французськый уряд глядат незадекларовані базены штучным інтелектом

Уряд Франції зобрав почти 10 міліонӯв евро дани из властникӯв базенӯв — туй не обыйшло ся без штучного інтелекта.

Схема така: берут ся публично приступні фотькы, учинені з высоты потячого лїтаня французськым Націоналным інштітутом ґеоґрафії тай лїсництва, давут ся шпеціалному проґрамови, розробеному врокаши фірмов Capgemini тай Google. Тот проґрам находит у люди базены тай звіряє інформацію за них из державныма даньовыма реєстрами.

Чом так? Просто у Франції данї на нерухомӯсть залежат уд цїнности хыжі — базены чинят ї май цїннов, а значит властникы незадекларованых базенӯв платят май мало дани ги мали бы подля закона.

Проєкт раз не дуже масовый: из усьых 96 адмініштративных департаментӯв метрополної Франції раз оброблено лиш 9, айбо при тӯм ініціатива уже устигла помочи з ідентіфікаційов 20 356 незадекларованых базенӯв — за йсе пише выданя Le Parisien из удкликованьом на Ґенералный діректорат публичных фінансӯв Франції (DGFiP, щи знамый ги Le Fisc).

Типирькы проблем незадекларованых базенӯв щи май остро стойит про французськый уряд, бо на збӯлшеня числа личных базенӯв у Франції читаво повплывав локдавн позад CoVID-19.

Зачатково у софтвера на вызначіня базенӯв быв доста высокый процент хыб — 30%, бо проґрам часто брав за базены другі архітектурні елементы, такі ги сонячні панелы. Айбо ги заявлявут DGFiP, на днишньый динь сись проблем уже рїшеный. Кроме того, планує ся розшырити хоснованя алґорітма на ушыткі другі департаменты Франції, кроме заморськых, а щи зачати хосновати го на гляданя другых незадекларованых архітектурных вылїпшень — приміром, веранд авадь додаточных будовиль у кертох.

French tax officials use AI to spot 20,000 undeclared pools

Scheme to be extended across the country after trial in nine departments led to extra €10m in tax receipts

The GuardianKim Willsher