Інтерфийса: Убрані статї 2024

Аж исьте трафили на йсю сторӯнку, та майскорї інтересно вам, што вто за книга «Інтерфийса: Убрані статї 2024», за што у нюв ся пише тай як ї мож дӯстати.

Што вто є?

Ися книжочка обсягує статї, написані у гатарах проєкта Інтерфийса двома авторами: Мигальом Лыжечком тай Петром Біровом. Тематика така, ги у нашого вебсайта: популарна наука, технолоґії, техніка тай усьо, што з нима скапчано. Наприклад, из текстӯв узнаєте за вто, як из часом ся міняло представленя нашої наукы за діносаврӯв; якый прінтер вам буде майлїпше паровати залежно на ваші потребы тай ситуацію; чого ChatGPT не приказує добрі по-нашому и так дале.

Удну є 15 стати, а тираж книгы — 300 дарабӯв.

Книжка была выдана на зачаткови 2025. року тай уддає ся за донат на фонд «Рух підтримки закарпатських військових» у розмірі выд 300 украйинськых гривнюв (UAH) из указаньом скріншота з донатом авадь другого способа пудтвердженя оплаты.

Сут ищи книгы?

Айно, щи їх маєме!

Кидь хочете дӯстати книгу — реґіструйте ся у сюв формі. Датко з Інтерфийсы зконтактує вас, обы прокомуніковати, як платити тай куды заганяти.

Правда, ож исї статї уже сут на сайтови?

Кидь тото не было ясно из інформації высше, та вартує уточнити: книга обсягує статї, котрі сперед тым уже были опубликовані у нас на сайтови. У папірьовӯв збирьцї найдете и три публикації, котрі дочасно сут ексклузівными у папірьови, тай щи ниґде ся не указовали.

Ися книга є нечастым трафунком, коли публикації из веба адаптововали ся на папірь, а не наспак.

А нашто исе тогды?

Папірьова збирька публикацій нашого проєкту мала за собов даяку комбіновану цїль, зкурта:

• Побзерати, ци людьом доста інтересна література сякого филя, обы дати за ниї гроші. Моментално література по-русинськы жиє поза фінансовыми транзакціями, кой бӯлша частина тиражу просто дарує ся цімборам. Хотїли сьме побзерати, ци є у шорового читача домак інтерес куповати сякый филь читаня;
• Потенційно донести наші тексты до тых читачӯв, котрым май комфортно читати у папірьови ги з екрана;
• Мати даяку фізичну памнятку за проєкт. Мож раховати исе подарком на четветрый гӯд проєкта як читачам, так и всїм, тко ся трудит над Інтерфийсов.