Назоры

Єден динь из гычкофоном — Nokia C3-00

Не так давно у нас выходив матеріал за тото, ож чом докус пропали телефоны из фізичныма клавешницями. У тӯв статї споминав ся ай наш днишньый герой — Nokia C3-00. У сьому дописови розкажеме вам як ото мати сякый телефон ужек днись, в модерному світови, де Російська Федерація убиват люди в Украйинї. Мож так казати ож сесе буде «реаліті-шов» за єден динь из гычкофоном.

Направду мусиме ся признати, ож конкретно сись девайс не є аж дуже «тиґлов», бо має мовчано доста читаво інтересных функцій, котрі даже у тот час скорше были атрибутами смартфона. Мож даже повісти, ож С3-00 — тото смартфон на мінімалках. Но давайте побзераєме май детайлно чом сесе не докус «гычка»:

У сього телефона є Wi-Fi модуль. Сесе вже даже не просто доступ ид інтернетови, ай высокоскоростный доступ.
Має натівну аплікацію доступа до електроної пошты.
Має веб-бравзер (даже два: Ovi Browser, Opera Mini)
Має бовт аплікацій. Може не такый читавый, гикой Apple Store, айбо сам факт можности установкы аплікацій тото не фіґля.

Што му реално хыбит обы ся кликати смартфоном — операційна сістема. Закидь ушыткі його старші ровестникы фунґовали на Symbian, сись девайс має лишек кастомізовану S40. А значит у вас не буде ниякої мултизадачности, аплікації будут читаво обмежені, ниякых push-нотифікацій выд аплікацій не буде, переключеня помежи аплікаціями буде означати страту даных, из котрыми сьте робили. Но тай читаво другых нюансӯв, за котрі бы сьте ани не подумали.

Давайте раз розпозераме його реалні спеціфікації:

TFT екран має 320х240 пікселюв (4:3) из значіньом ppi ~167 (пікселю̄в на дюйм квадратный)
Фізічна QWERTY-клавешниця
Слот карты Mini-SIM (щи така велика)
Памнять: 64 меґабайта свої + слот MicroSD (карты до 4. ґіґабайт)
Камера: 2 меґапікселя, може писати відео из 15 кадрикӯв за секунду, фронтової селфі-камеры ниє
Комунікації: GSM модуль (2G, макс. інтернет. спой - Edge); Wi-Fi 802.11 b/g; Bluetooth 2.1, A2DP, EDR; FM-радіо, microUSB 2.0
Пуддержка форматӯв тай аплікацій: авдіо MP3/WAV/WMA/eAAC+; аплікації Java (MIDP 2.0); відео MP4/AVI/H.264/WMV; інтернет WAP 2.0/xHTML, HTML, Adobe Flash Lite

Вызират непӯдло, ги на телефон, якому 12 рокӯв, ци не так? Но давайте побзераєме як тото буде на практицї.

Динь из C3-00, реаліта

Телефон, котрый днись роззираєме, купив ся за смішні гроші на OLX, приближно 450 гривнюв. Уповісти чесно, автор сього чланка чекав мати у руках дашто многым бӯлшоє. Сись ветеран QWERTY-клынцаня видит ся у руках дуже піціцькым, рунявучи из днишньыма «лопатами».

У сись момент стало нараз понятно, ож набирати текст на сякӯв клавешници буде не аж так легко, ги ми ся видїло сперед сим. Хоть фізична клавешниця вызират добрі, но міста на кажду ґомбу є многым менше, гикой на сенсорному дісплейови, та май тяжко є по нюй попасти перстом. Тай автор має щи не майчитаві персты помежи потенціалными хосновачами телефона.

Телефон

Функціоналнӯсть ги телефон у сього девайса читава. Не позиравучи на тото, ож не держат ся модерні стандарты 3G/4G(LTE), сугубо звонити тай писати смс є го бӯлш ги доста. Кидь маєте дома у фійовци даякый старый телефон, котрый у вас ги «запасный», та ипен наша Nokia C3-00 буде рӯно така шіковна, гикой тот ваш, кидь не лїпша. Маймало, ож смс-кы ся на нюм направду шіковно набиравут. Кидь рӯняти из днишньыми широкыми проґрамовыми клавіатурами на смартфонах, та буде ясно май помалы, но май быстро, гикой из 12-ґомбовов клавешницьов.

Камера

Туй даже ниє што розказовати, камера препаскудна, даже кидь руняти из ровесниками сього телефона. Заявлені 2 меґапікселя тото звучит читаво, но реална кваліта образчикӯв смішна. Хосновати сесе гикой фотокамеру не буде реално. Автор си споминат, ож спередущый телефон його, Sony Ericsson k550i (рока 2007), котрый тоже мав заявлено 2 меґапікселя, чинив многым май читаві образчикы. За відео такой нїшто казати. Камера 1/10, редакція не рекомендує.

Біціґля, выфотькана у добрый, сонячный динь, на Nokia C3-00

Інтернет

В теорії ушытко звучит супер: є у нас Wi-Fi, є у нас бравзер, сут у нас натівні аплікації тай бовт из аплікаціями! Та сесе домак смартфон!

Но, поскоро ся было радовати. Реаліта є така, ож телефонови уже 12 рокӯв, тай сервісы, што мали пудпорьовати роботу сих аплікацій, уже давно не доступні.

Натівна аплікація «соціалок» не може зконтактовати ся из сервером, натівна аплікація електроної пошты не може зконтактовати ся из сервером, а бравзер не валовшен тягнути модерный інтернет.

Так тямит ся ож у 2011-2012 рокох інтернет щи не мав много JS-скриптӯв на сторӯнках, тай в бӯлшости было доста пудпоры простого HTML обы мати возмогу читати інформацію на сайтох тай выдписовати людьом у соціалкох. Бӯлше того, автор споминат, ож станом на 2011. гӯд, Nokia C3-00 могла ся похвалити аплікаційов YouTube, де мож было глядати тай позирати відеа у кваліті 360p. Днись тото ушытко недоступно. Маркет аплікацій неприступный, бо не фунґувут серверы, изтягнути аплікації даґде на інтернетови тоже было доста тяжко. Найшли ся лишек пару робочых аплікацій (Twitter, Facebook), но ани єдна не фунґовала справно. Twitter переставав фунґовати на моментови провбы лоґінізації (аплікація дӯставала сістемну хыбу, кой пробовали сьме увести сімбол @), а тварьова книжка даже ся не запустила.

Но туй ся спомнило, ож є щи алпікація на компютер, из котрої мож іншталовати аплікації у телефон!

Долиш обы дӯстати аплікації, треба ся пригласити в акаунт, а акаунт учинити не мож, бо не фунґувут сервісы Ovi Nokia. Тай на сюм курта бисїда.

Лишат ся нам лишек бравзер, но ай тот не побирує модерный веб.

Айно, можете на ньому дашто поґуґловати, побзерати вікіпедію, тай прочитати руно сесю публикацію Інтерфийсы, но даже сесе буде потяжко. Nokia C3-00 не готова ид модерному інтернетови, а ушытко, што му давало силы у рокови 2011, дниська уже не жиє.

Супокӯй

Варта спомнити, ож за динь хоснованя сього телефона, не прийшла авторови ани єдна push-нотіфікація из даякого інстаґрама авадь фейсбука. Динь минув направду май супокӯйно. Спозад сякої ограничености телефона у функціоналови, у автора не было можности скилтовати много часу у соціалных сїтьох, тай процент дістракції быв мінімалный.

Щи єден бонус, за котрый ся нараз не подумало — час роботы выд батеркы. На момент написаня сього текста, наш C3-00 уключеный уже три дны, айбо щи ани єдна «паличка» му ся не выбила. Кӯлко вӯн прожиє на єдному зарядови батеркы раз лиш єден Бӯг знає.

Выслїдкы

Сисї два дны из телефоном Nokia C3-00 были доста інтересными, хоть часточно аскетічными. Телефон файно сидит у руци, має добрый пластик тай желїзный крыт иззаду, не чує ся ож держиш у руках дашто дуже туньоє.

Позітівноє

Батерка телефона буде держати, кидь добре поличили сьме, бӯлше ги тыждень. Мож го хосновати як радіо, плеєр на музику (Bluetooth-наушникы пӯдключавут ся легко), легко выдержит повно годин говоріня тай писаня, буде стабілно фунґовати, не буде зависати, аплікації (котрі в ню̄м є) будут фунґовати без хыб. Набираня текста на доброму уровньови.

Неґатівноє

Ушытко, што робило сись телефон направду інтересным, тай давало му возмогу конкуровати из подакотрыми смартфонами свого часу, типирь наглухо не робит. Маркет аплікацій, інтернет сервісы — ушытко мертвоє. Даже веб-бравзер не побирує нич, кроме ги заґуґловати курс російського рубля (мож не ґуґловати, вӯн май дешевый выд балеґы). Фактічно, исе и є посправдїшня тиґла.