Конець слободы в Android?

У Google дорадили ся читаво поміняти приступ ид тому, як вы, прості хосновачі, можете іншталовати аплікації на ваш смартфон. Сякоє рішеня пуд корінь помінят цілу екосистему смартфонув на Android. Годно быти, ож прийшов конець Android-ови, як повностю удкрытув платформі, де ся розробникы проґрам чули «як дома».

Слобода розробникув у небезпеці

З помежи усьых змін, котрі Google заплановали для Android у слідуючому році хочеме позоровати вашу увагу на мусайну реґістрацію розробникув тай верифікацію персоны. Сесе ся докыват не лиш розробникув, котрі плануют публиковати аплікації у Play Store, айбо и поза ню — у другі «бовты аплікацій».

Як ся знає моментално, вы, як простый челядник, можете собі зріхтовати нову аплікацію на телефон, самі собі наіншталовати ї на свуй телефон, тай тестовати, хосновати ї. Сесе має читаву выгоду не лиш про даякі нішові аплікації, котрі доста тяжко пропхати у Play Store, но и про вшелиякых студентув, котрі не мавут доста фінансовых ресурсув тай часу, обы ся з тым бабрати, што читаво лімітує йих слободу в учіньови.

Зкурта, читаво выросте порог входа у світ розробкы и дистрибуції аплікацій.

Google лімітуют не лиш інсталацію проґрам через Play Store, но и через алтернативні бовты, гикой F-Droid. А значит така лімітація докыне ся розробникув, котрі не хотят розкрывати свою пресону, авадь просто не хотят проходити філтрацію бовта уд Google.

У минулости Android фурт промотив ся гикой удкрыта платформа, де всьо є доступноє и прозороє. Но видко тоты зачаточні засады ся скоро годни читаво поміняти. Чим дале, тым Google тягне ся у бока розробкы «за запертыми дверьома», принимаючи чим дале тым менше контрибуцій уд комуніты розробникув тай принимаючи рішеня лишек удну фірмы.

Шырока стратеґія: інтеґрація з ChromeOS

Часточно такоє рішеня могло быти частинов плана споєня Android тай ChromeOS. Знаєме, ож Google мают амбіцію в далекув перспективі золляти тоты дві платформы довєдна на основі Android, маючи рішеня як для мобілных телефонув, так для десктопных компютерув. Консолідація такых двох инчакых напрямув мусит мати пуд собов даяку централізацію контролы, а значит и менше простора діла слободных експеріментув розробникув.

Безпека ци контрола?

Основным арґументом Google за таку зміну є звышеня уровня безпекы в цілому. Заставляючи усьых розробникув реґістровати ся, тай заказуючи іншталовати аплікації без пудписаного жерела Google бизуют, ож читаво зменшат трафункы вірусных аплікацій, авадь другої активности из злыми умыслами.

Хоть сесе тверджіня є правдивым, критикы уважуют, ож Google и без того добрі звысили уровень безпекы на Android за послідньый час. А значит мусайна реґістрація узират лишек як крок до повної контролы над розробниками, а не як крок против шкодливого софтвера.

Мене, як челядника, што часто хоснує аплікації з усякых жерел, така зміна насторожує. Може даже заставит ня перейти на iPhone. Я писав усякі проґрамы на Android, котрыми ся легко муг поділити з цімборами, а з таков змінов тото стане невозможно, и сесе ня не радує.
— Андрій, студент, молодый проґрамішта

В тот самый час не так давно Google запустили службу Play Protect, котра моніторит роботу ушыткых аплікацій на вашум телефоні, незалежно, ци наішталовані з Play Store, ци з другого жерела, и може блоковати потенційно шкодливу активность тых проґрам. Сим такой Google провказуют, ож можут мати безпеку вашої направы на контролі. Та якый тогды хосен заказовати інсталацію аплікацій из другых жерел и силовати розробникув передавати у Google свою персоналну інформацію?

Поєдны експерты кажут, ож прикрывати такоє рішеня безпеков є доста лицемірным, приводячи у приклад, як тоты такой Apple и Windows додержуют ся права хосновача мати контролу над аплікаціями на свому компютерови. Маючи «макбук» авадь простый десктопный компютер, вы можете стягнути аплікації з другых жерел через ваш бравзер, наіншталовати и хосновати йих, авадь такой розробляти свої проґрамы без потребы заплатити за тото гроші и передати личну інформацію. И сесе не нарушат концепцію безпекы платформы, бо компютеры на macOS и Windows сміло ся хоснуют даже в бізнес-контекстах з высокыми вымогами безпекы. Та чом ваш телефон має ся з тым справовати многым май строго?

Чого сеся інформація важна для вас

Платформа Android у рокови 2026 може вызирати докус не так, як сьме ї привыкли видіти днесь, тото вже не буде удкрытый світ, дружньый до розробникув и хосновачув. Платформа, котра колись была удкрыта для ентузіастув, модерув, стане гет закрытов и уподобит ся до головного конкурента — Apple.

Прості хосновачі Android, гикой вы, котрі майбульш берут аплікації якраз из Play Store, не увидят великої розлукы по сюй зміні, маймало на зачатку. Но цілком платформа закрятат у бока централізації контролы над усіма сферами роботы, што в скорому часови напряму вплине на каждого хоснвача, а май — аж хоснуєте нішові аплікації без многоміліонової авдиторії.

Многі розробникы, котрі не будут хотіти передавати Google свою личну інформацію, можут домак перестати пуддержовати свої аплікації. Подашто из того, што хоснуєте каждый день — а майскорі тото ся буде докывати нішовых аплікацій — може пропасти з Play Store навхтема, не маючи алтернативного жерела.

Бульше того, аж сяка зміна набуде силу — Google напряму буде контроловати, які алпікації мож, а які не мож, хосновати у даякых конкретных державах. Наприклад, мы уже знаєме за трафункы, коли уряды держав додавили Apple заблоковати поєдні аплікації у Apple Store. У рокови 2024 уряд Росії добив ся блокованя пиля 60 VPN-аплікацій, як пишут circleid.com, што є прямов атаков на слободу доступа до інформації. Не ліпше ситуація вызират и у Кітайови — за тото пишут wizcase.com. Ци хочеме сяку цензуру и уд Android?

Жерела: f-droid.org, developers.google.com, technobezz.com