Конець монополії

Google а Epic Games нечекано договорили ся про реформы, котрі дадут булше слободы розробникам на Android. Щи в 2020. році Epic Games подала в суд на Google, скаргувучи ся на монополію Play Store на Android.

Айбо наконець Google загодили ся удкрыти Android діля другых бовтув аплікацій, а на Play Store вбалити комісію з 30% до 20% вадь 9% подля типа трансакцій. Ищи розробникы будут годні класти другі системы оплаты кроме Google Play Billing, тым самым мавучи можность понукати май малі ціны хосновачам, котрі выберут алтернативный способ. До того же, Google загодив ся булше не платити выроблячам смартфонув за ексклузівноє іншталованя проґрам: даякі компанії мали прибыль за іншталованя Play Store «из завода», што зниячило конкуренцію другых бовтув аплікацій. 

Кідь суд прийме внесену угоду, то сякі переміны будут діяти до юнія 2032. рока и се, скорше всього, читаво вплыне на всю мобілну індустрію. Apple, Sony, Nintendo мавут такі самі вадь даже май строгі правила на свойых платформах — завто мож чекати ефект доміно: они мусят вадь поміняти свої правила вадь стати обєктом критикы а прирувнянь з Google.