Моцный компютер у складнӯв клавешници — реално

Из многых мінімалістічных варіантӯв переносных компютерӯв сись є, на думку редакції, єдным из майінтересных, што ся появили на торгови у послїднї годы. Направа обсягує доста читавый процесор (даже за новтбучными мірками), батерку, трекпад, убстане ся вам найти лишек образовку обы го мочи хосновати.

Из фізічного напарованя можеме видїти вӯсям-ядерный AMD Ryzen 7 8840U, котрый у бенчмаркови на www.cpubenchmark.net указує удвычі бӯлші ціфры, як процесор на новтбукови, де ся моментално пише ися публикація. Дає ся убрати 16 авадь 32 ґіґабайты оперативної памняти, тай 512 ґіґабайт авадь 1 терабайт фурташньої памняти M.2. Из батерков на 16 000 mAh выробник бизує нас на 10 годин офісної роботы, авадь 6 годин проникованя відеа, закидь из бавками дотягне до чотырьох.

Рунявучи из подобными направами сеґмента міні компютерӯв, ися складна клавешниця має щи май дрӯбні розміры як його прямі конкуренты гикой AtomMan X7 Ti.

Выробник понукат хосновати VR-околарї замісто привычної стаціонарної образовкы. Є видко, ож фірма мірит на щи ненапытаный торг VR-направ, котрі ся лиш-лиш появлявут, тай не мавут доста сценарӯв хоснованя. Хоть у тот самый час на презентації исю клавешницю пудключали и до телевізора, и до планшета, и до простого смартфона, де послїдньый зась быв лиш образовков.

Раз не є ясно, коли будете годни купити таку бавку собі. Раз сут лиш 200 тестовых екземпларӯв, тай раз ниє інформації, ож коли выробик у Кітайови буде плановати широкый выпуск у світ, спозад чого и тяжко проґнозовати точну цїну, хоть Tom's Hardware у свому убзираньови указали 412 тай 495 америцькых доларӯв за верзії з меншов тай бӯлшов памнятьов.