Над розробков сїтї 6G робит ай фірма LG

Технолоґічный проґрес не стойит на містї, уже знаєме перві детайлы за будучі сїтї стандартна 6G.

LG Electronics у спуйці з двома нїмицькыма інститутами уже веде пробы роботы «кӯстяка» сістема 6G — канала передачи информації. Ужек было досягнуто непӯдлі резултаты: передача податкӯв на 250 метрӯв через частоты выд 155 до 175 ґіґагерц, сим досягнутьом ся нараз похвалили у компанії. Но сесе лиш зачаток, бо чекат ся, ож готовый прототіп буде валовшен передавати до 1 терабайта податкӯв за секунду. Правда фірма раз не анонсовала даты возможної комерціалізації.

До слова, LG далеко не єдні, тко робит над 6G — тым ся ще занимавут и даякі другі компанії: науковоє єднання ComSenTer, тай ищи Samsung и Huawei, не кажучи вже про державні проєкты.

Што тото значит для простых хосновачӯв?

Днишньый хосновач мало коли може запримітити роздїл помежи сїтьов 4G и 5G — каждоденні сценары хоснованя вашої мобілної направы, ци вто телефон, ци планшет, не будут силно инчакі. Ладованя інформації з інтернета фунґує так быстро, што разниця межи 4G тай 5G дораз не чує ся. Выгоду выд сїтї 5G можете направду учути хыба у трафунках, де вам направду треба дуже широкый канал передачі податкӯв, гикой уддаленоє корманьовня мотором, комунікація помежи літавучыми дронами, аналітічні сістемы, тай много другого, што шоровый хосновач мобілного телефона знати не буде.

Раз можеме собі лем гадати ба які нові можности нам удкрыє технолоґія 6G, видяти типирїшньый контраст межи 4G тай 5G. Задержка при передачі інформації ся зменшит щи май силно, што удкрыє путь такым технолоґійом, гикой уддалена контрола точної механікы, авадь дістанційна хірурґія.

Розробка технолоґії 6G  набизӯвно має преповно перспектів, тай не чудно, ож у єї розробци конкурувут помежи собов такі технолоґічні ґіґанты. Будеме видїти што з тым буде дале.

Авторськый текст Інтерфийсы.