Feb 2, 2025 Новостї

Папірьова Інтерфийса увидїла світ

Дуже сьме ся раді вам похвалити, ож за печатну збирьку статий Інтерфийсы 1. фебруара 2025. року прӯйшла скромна закрыта презентація в Ужгородськӯв публічнӯв бібліотецї, на котрӯв гостї дӯстали пирві дарабы. Розказуєме тай указуєме, як ото было тай што ся там говорило. Аж исьте ся щи не зареєстровали на свӯй примірник папірьової «Інтерфийсы», читайте до кӯнця тай заповнюйте реєстраційну форму.

На презентації гостї мали можнӯсть учути накурто уд Мигаля тай Петра, ож як ся зачинав проєкт «Інтерфийса», як ун из часом перейшов из формата вісти у формат май довгых, айбо май надовго актуалных текстӯв, які нюансы повливали на процес роботы над книгов.

Доброє дїло

Каждый гость на презентації мӯг дӯстати книгу за донат громадськӯв орґанізації «Рух підтримки закарпатських військових». Єдна книга йшла за донат уд 300 грн, дві книгы — за донат уд 600 грн. Моментално не даєме бӯлш як дві книгы в єдні рукы, бо щи маєме испис люди, котрі бештеловали книгу май давно, як сьме голосили туй, а число книг є лімітованоє.

Бігом презентації пӯшли в добрі рукы нашых честованых гостьох 23 книгы, а значит зобрали сьме на благо фонда веце як 6900 грн — попри вто, ож за єден дараб мусай было задонатити маймало 300 грн, поєдны гостї замітовали на банку май много.

Бігом недовгої павзы авторы автоґрафовали книжкы, а пак Мигаль ся подїлив далшыма планами на будучнӯсть Інтерфийсы тай потенційні проєкты, котрі можут ся реалізовати вдяку інтересови люди до сього свіжого печатного выданя: наприклад, словник термінолоґії, котра ся хоснує у Інтерфийсї на вшелиякі темы.

У самому кӯнци презентації лишило ся місто на сесію звіданок-удповіди (Q&A). На нюв уд авторӯв ся поінтересовали тым, у котрых крайинах Інтерфийсу читавут майбӯлше: статистика сайта указує, ож бӯлшина нашых читачӯв в Украйинї, США, Чехії тай Польщи. Зазвідали ай якый выйшов тираж — у сумі тото 300 дарабӯв, из котрых часть пӯйде у бібліотекы тай на поличкы книжных кафе Ужгорода. Наприклад, годні сьте почитати «Убрані статї Інтерфийсы» у кафе на улици Лаборця, 2 тай у комуналному закладови «Ужгородська публічна бібліотека» у Пасажі.

Красно дякуєме вшыткым честованым читачам, гостям, Ужгородськӯй публічнӯй бібліотецї,
выдавательству «РІК-У»,
бӯйцям Збройных сил Украйины
тай «Рухови пӯдпоры закарпатськых воєнных»!

Фотоґрафії Сергія Денисенка

Не забыли сьме ай за тых, тко ся реєстровав у формі!

Кидь читаєте исю новину за презентацію тай пробігла вам у голові думка: «а де є моя книга? Пак реєстровали сьме ся у документови!» — не переживайте, не забыли сьме за вас. Зконтактуєме каждого, тко лишав контакт через исю ґуґел-форму бігом слїдуючого тыждня, обы уточнити детайлы оплаты тай доставкы. Ото забере час, бо чиниме тото самі. Гаткуйте за поштов, бо дӯстанете оповістку.

Я ся не устиг зареґістровати! Што чинити?

Не бай! Пишіт контакт у ґуґел-форму, маєме щи даякоє число книг. Аж ся стане так, ож запишете ся уже кой ся книгы кӯнчат — будеме мирьковати за додрукованя, аж ся вас назбират доста. Туй ушытко просто.