Што ся стало из Siemens?

У продовжіня нашої серії за технолоґічных ґіґантув, котрі закрятали не туды, маєме фірму Siemens.

Тко вто такі?

Руно так, як и минулі компанії, за котрі сьме говорили у сюй серії, Siemens ото фірма из доста довгов історійов, што тягне коріня онь из 19. стороча. Заклали фірму Вернер фон Сіменс (Werner von Siemens) тай Йоган Ґеорґ Галске (Johann Georg Halske) у Берлінови у рокови 1847. Из самого зачатка робили из електриков, прокладовали телеґрафні линії — та мож казати ож уже тогды «изязовали» люди межи собов.

Бігом двадцятого стороча Siemens розросли ся у ґлобалну корпорацію, дуклали руку не лиш до електричної інженерії, но и до електроґенераторув, транспорта, медичного напарованя тай шелиякої автоматизації. До конця 90. рокув фірма мала читаві успіхы у дораз каждув сфері, дотычнув до інженерії; мала дуже широкый розмах спеціалізацій.

Не на фіґлю, без фірмы Siemens не могли бы сьме собі представити ни модерні технолоґії ґенерації електрикы, ни многі телекомунікаційні технолоґії (включно из A-GPS), ани модерні рентґеновські апараты тай апараты компютерної томоґрафії. Без Siemens домак не так бы вызирали такі привычні нам річи гикой штрека авадь проґрамовані контролеры на фабричных конвеєрах.

Мобілні телефоны

Не позиравучи на ушыткі досягнутя компанії, скорше всього у кунци 90. тай на зачатку 2000. рокох чули сьте за них скорше спозад мобілных телефонув, гикой спозад апаратув компютерної томоґрафії, ци не так?

Автор сьої публикації мав першым телефоном Siemens C35, котрый дустав у спадок уд старшого брата, закедь тот си купив обнову — Siemens C65, котрый вже мав цвітну образовку. Тота серія ся позиціоновала як «доступна верзія» бізнес класу: муцні, компактні, из прекраснов квалітов фізичного напарованя.

Маючи доста скушеностий у всякых сферах інженерії, телекомунікацій тай електронікы, было бы онь чудным, кобы на зачатку 90. рокох Siemens не попробовали побороти ся за місто на свіжому торгови мобілных телефонув, што творили гет нову нішу уживацької технікы. Великым плусом быв и читавый кредіт довіры до компанії, котра вже бульш як стороча мала перфектну репутацію, и тот факт, ож якраз Siemens актівно были у розробці GSM-технолоґій.

Пік успіху

На зачатку 2000. рокув Siemens доста насерйозно конкуровали з такыми світовыми ґіґантами того часу як Nokia авадь Samsung. Фактично пік по обйомови проданых телефонув Siemens мали у рокови 2003, маючи пиля 8,4% торгу мобілных направ. Сесе была дуже серйозна цифра; нараз сперед ними были Samsung из 10%, Motorola из 14%, на котрі из острахом никали и лідеры тых рокув — Nokia, сидячи из ~35% торга. Мож сміло уповісти, ож Siemens были у первуй пятці выробникув мобілных направ у світі.

Як ся кунчила історія Nokia, писали сьме не так давно:

Што ся стало из Nokia?

Марафон уд майпопуларного телефона у світі до забытя.

ІнтерфийсаМигаль

Туй вартує спомнити и дакулько конкретных моделей, котрі стали в якуйсь мірі леґендарными авадь просто прорывными на свуй час.

• Siemens S10, што быв презентованый світу у рокови 1997, быв первым мобілным телефоном из «цвітным» дісплейом. Хоть технічно говориме лиш за 3–4 барвы, сесе было дуже серйозным тай інтересным кроком у світови привычно монохромных образовок.

• Siemens SL10, выпущеный у рокови 1999, быв первым у світови телефоном у формфакторови слайдера, де клавешниця ся прятала пуд екран.

• Siemens SL45 увидів світ у рокови 2000. Сесе быв первый у світови телефон из функційов найграваня музикы в MP3-файлах тай картов памняти онь до 32 меґабайт! Такой за ним уйшов и май бюджетный варіант SL42, из картов до 16 меґабайт тай без докстанції.

• Siemens M65, выпущеный у фебруарови 2005, не быв натулько технолоґічно прорывным, як минулі направы у сьому исписови, но буде персоналным фаворітом автора сього тексту як послідньый леґендарный телефон компанії. Маючи ґіґантськый дісплей як на свуй гуд выпуска, M65 муг ся похвалити відеокамеров тай вебовым бравзером, и годен быв протягнути до 300 годин на єдному зарядови батеркы — не кажучи вже за корпус из рейтінґом защиты IP54, стуйкый ид трафляньови воды тай пороха. (Тко знає — кобы історія завернула инчако — ци конкуровала бы йся серія из днешньыми CAT и Sigma Mobile?…)

Путь удолину

Аж всьо было так добрі, та де сут мобілні направы уд Siemens днесь? Чого на полицьох не видиме їх смартфоны попиля Samsung тай Apple?

Фірма Siemens зачала просідати уже з рока 2004, и никаючи у минулость, можеме указати перстом на дакулько рішень, котрі ся указали стратеґічно неуспішными и привели ид краху мобілного сеґмента.

• Фірма мірила на сеґмент бізнес-направ тай телефонув у середньому ціновому сеґментови. Бояли ся експеріментовати. Подобно до того, як зробили у свуй час Blackberry, Siemens акцентовали маркетінґ на бізнесменох, котрі вже перестали были быти основными куповачами телефонув. Челядь хотіла дашто май стілноє, а такі моделі у Siemens трафляли ся не часто.
• Фірма дуже запоздила из адаптаційов трендовых напрямув. В тот час, як Nokia не бояли ся експеріментовати из формфакторами тай барвами, уд Siemens так сьме ся и не дочекали інтересных телефонув у форматі «жабкы» (розкладушкы).
• Siemens не пиловали переносити выробу у Азію, як зробили многі їх конкуренты в тот час, спозад чого ціна на їхні продукты перестала быти конкурентнов. Фірма буквално загрузла в довгах и не могла убалити ціну на свої направы до уровня прямых конкурентув.
• Стаґнація операційної сістемы. Закидь другі бренды експеріментовали из смартфонами, Siemens не побировали выйти за рамкы свойих доробок кунця 90. рокув. Не позиравучи на непудлу кваліту желіза, хосновачі чим дале, тым ся май скарговали на забаґовану операційну сістему, з котров фірма не устигла нич зробити.

У рокови 2005 фірма Siemens продала ушытку конару мобілных направ тайванськуй компанії BenQ, котра продовжила выпуск телефонув пуд брендом BenQ Siemens. Звучит знакомо, нє? Азійська компанія купує уд старої європейської фірмы сеґмент мобілных телефонув и тручат го з новов силов… Айбо на удміну уд Sony Ericsson авадь Nokia, нові ґазды из Тайваня не побировали корманьовати из дідузнинов Siemens и два цілі рокы. Ужек у 2006. рокови BenQ Mobile убявили банкрутство, бо переоцінили потенційный торг свойих телефонув, и фактічно стали на тоты самі граблі, што и минулі ґазды з Європы.

Што там днесь?

Подобно до минулых компаній, за котрі ся споминало на нашому сайтови, фірма Siemens не клала ушыткі яйця у єдну кошарку тай зато не заперла двері в момент продажу мобілного сектора тайванськув фірмі. Як ся вже споминало, Siemens фурт мали читавый розмах у напрямах роботы. Хоть булшина люди в нашум краю знала за них скорше якраз спозад мобілных телефонув, ото не значит ож мобілні направы даколи были для них основным, авадь майважным напрямом. В рокы піку популарности телефонув пуд сим брендом, мобілный сеґмент приносив корпорації лишек крыхту дохода. За фіскалный 2003. рук (1. октовбра 2002 – 30. септембра 2003) Siemens удзвітовали были, ож заробили 74 міліарды єврув, з чого удділ мобілної комунікації принюс їм быв лишек 10 міліардув — скромні ~13.5%.

Продаж мобілного сеґмента діла Siemens не быв такым катастрофічным ударом пуд дых, гикой тото было, до прикладу, для Nokia, з котрыми у сьому текстови проводило ся немало паралелюв. Як на зачатку 2000., так и днесь, Siemens убстає ся дуже серйознов фірмов у выробі медичної технікы, штрекы тай метра, електричного напарованя хоть-якых маштабув и у многых другых напрямах інженерії. Хоть консервативні назоры и іґнорованя трендув на зачатку 2000. рокув вытручали їх из торга мобілных телефонув, не можеме ся чинити гибы Siemens, як ґлобалный технолоґічный ґіґант, даяк читаво уд того пострадали.

Жерела: Stéphane Bret / Siemens ICM France, Wikipedia, siemens.com