Што ся стало из Sony Ericsson?

У вжек далекому рокови 2006 молодый хлоп (автор сього тексту) выбирав си першый серйозный телефон, мирькуючи помежи бюджетными варіантами выд Nokia, Samsung, тай Sony Ericsson. Тото быв першый „серйозный“ телефон, бо брав ся вже за свої гроші, а не успадкованый выд старшины в родині. Но та кедь береме за свої гроші, та можете собі представити, ож такі флаґманы як Sony Ericsson K750i ани не розниковали ся, та автор скромно узяв си K550i из серії Cyber-shot, и пак ани раз не пошкодовав за такый выбор. Теплі споминкы за тот муцный и елеґантный телефон сподвигли написати текст и за сесь бренд.

На удміну выд спередущых публикацій, де сьме розказовали скорше траґічні історії, як великі тітаны індустрії ся шпотали у камінчикы на пути и падали долув из страшным тріском, історія союзу Sony и Ericsson доста ичнака. Сесе історія продуктивної колаборації и зоправді інтересного пуднесеня.

Два окремі путі

Важно уповісти, ож до момента появы союзу межи Sony тай Ericsson обідві компанії мали довгу и не тривіалну історію, котра бы ачей заслужила собі окремый текст. Но днеська нам май інтересноє буде „дітвача“ сього злитя, гикой його „родичі“, та попробуєме тото описати дуже накурто.

Ericsson

Фірму заклав Ларс Маґнус Ерікссон у Стокголмови, Швеція, у рокови 1876. Фактічно заклав даже не фірму, а малый цех, де ремонтовав телеґрафы, а вже лиш май пак зачав и выробляти всякоє другоє напарованя на телекомунікацію.

З того часу фірма росла и не полишала свою пасію до телекомунікації. Маючи не єдну декаду скушености з сим сеґментом, уже в 1950. роках Ericsson зробили перші крокы и до мобіных телефонув. У рокови 1956 презентовали были и сырый прототіп мобілного телефона. Тяжкый, веліканськый, но робочый апарат.

У рокови 1987 Ericsson перезнтовали першый реалный мобілный телефон, котрый мав релатівный успіх у комерційному сеґментови, и тым самым вступили у велику битку ґіґантох індустрії, держачи силні позиції у 1990. роках.

Sony

Японська фірма Sony увиділа світ многым май пак уд свого будучного европського партнера — у майови 1946. рока ся появила орґанізація Tokyo Tsushin Kogyo K.K. у Токіо, маючи в голові двох людий: Масару Ібука тай Акіо Моріта. Тай лиш у рокови 1958 были перейменовані на Sony Corporation.

Основным фокусом компанії была друбна електроніка: транзисторні радіа, напарованя на роботу з маґнітными лентами и касетами, телевізоры. Вже май пак фірма голосно дала світови за ся знати портативными плеєрами серії Walkman. Маючи в жебі таку направу могли сьте заслужити завидні погляды уд многых ентузіастув технікы и гудьбы.

Што ся докыват ипен мобілных телефонув, та Sony пробовали попытати воду и туй, хоть явно менш сміло, як їх будучні партнеры у Ericsson. Бігом послідньої декады 20. стороча японськый техноґіґант устиг упустити дакулько моделюв телефонув, котрі мали релатівный успіх, но обєктівно фірма не раховала ся серйозным конкурентом тогдышньым лідерам, гикой Nokia, Samsung, Motorola…

Што ся стало из Nokia?

Марафон уд майпопуларного телефона у світі до забытя.

ІнтерфийсаМигаль

Союз

На удміну выд історії з Nokia авадь Siemens, за котрых сьме розказовали сперед сим, туйкы не было історії з выкупом европської фірмы азійськым ґіґантом уєдно з патентами и технолоґіями. У трафунку из Sony тай Ericsson — сесе історія успішного руноправного партнерства, котра была повна позитиву и ентузіазму.

Пиля рока 2001 убадва бренды ся указали у тяжкув ситуації у сеґментови мобілных телефонув: на єдного бока Ericsson мали добру технічну базу и читавый опыт у сеґментови телекомунікацій, но їм хыбіла скушеность у маркетинґови на нову діла себе нішу — просту челядь (туй треба тямити ож на зачатку 2000. року читаво ся поміняла основна авдиторія мобілных телефонув, бо они наконець стали доступными вшелиякым катеґоріям людий, а не лиш бізнес-сеґментови); а з другого бока у Sony не мали доста скушености з сеґментом мобілных телефонув. Їх личный бренд мав сміхотворно слабі позиції, но завто Sony мали добру репутацію у світі шелиякої мултимедії, націленої на гет-гет усякі сеґменты людий. Туй вартує спомнити, ож на тот момент за них у світови добрі знали не лиш спозад камер, а и спозад Walkman и PlayStation.

Знавучи сесе всьо, убодвом бокам сиї токмы ся виділо дуже добрым изкапчати ся до вороха и робити над новым брендом мобілных телефонув. Сякым падом, у апрільови 2001, сотворила ся фірма Sony Ericsson Mobile Communications, у котру по 50% вклали ся и шведы, и японці. У октовброви того такой року удоперли и основный офіс у Лондонови.

Сякый союз став посправді унікалным у модерному світови. Мало коли ся трафляла сяка токма „руно надвоє“, обы ся и руно надвоє ділили и доходы, и зодповідность за роботу. Щи май унікалноє в сьому союзови было тото, ож исе не быв союз єднакых компаній, а якраз изкапчаня технічного потенціалу Ericsson и маркетинґового потенціалу Sony, обы сотворити гет новый тіп мобілных телефонув: бизувных и парадных, симпатичных усьым ґрупам куповачув.

Путь до успіху

З момента, як ся исі дві компанії „поженили“, виділо ся, ож нич їх уже не зопре. Даяк так тото и выйшло. Маючи до вороха дораз сто рокув скушености у всякых сферах телекомунікацій и мултімедіях, Sony Ericsson побировали зробити читаві дизайнерські рішеня, котрі ся навхтема вкорінили у світови мобілных телефонув.

Середина двотисячных была повна експериментув и новых технолоґій: мобілні телефоны пробовали схрестити з шелиякыми другыми приручными направами, не лиш з фотокамерами и музичными награвачами. Sony Ericsson заслужили си видноє місто межи лідерами того часу, стаючи на пяты Nokia, Samsung, Motorola, тай LG.

Майчитавый рост фірма зажыла межи роками 2003 тай 2007, зачинаючи читавыми моделями середнього сеґменту, гикой T610, котрі мали дуже доброє технічноє напарованя и при тому модерный и унікалный дизайн. Пік припав на середину 2000. рокув: у 2006 Sony Ericsson продали пиля 75 міліонув направ, а у 2007 ужек верьх 100 міліонув направ. Так у тот період Sony Ericsson натвердо занимали четвертоє місто межи лідерами мобілного сеґменту у світі, мавучи пиля 9% торга.

А што такого прорывного они домак придумали? Якыми причудами Sony Ericsson заслужили любов широкої авдиторії? Туйкы окреме мусай спомнити за дві конкретні серії, іншпіровані вже екзістуючов техніков Sony: Walkman тай Cyber-shot.

Walkman

Сесе брендовоє имня тягне історію щи з рока 1979 — исе были доступні и квалітні касетні плеєры, котрі ся полюбили людьом у всюм світі.

Sony Ericsson презентовали серію мобілных телефонох Walkman у 2005. рокови, зачинавучи из моделі W800 — телефона-плеєра, у котрому якраз музика была ключовым функціоналом. Хоть, будеме чесні, другоє напарованя того телефона не поступало ся другым серіям.

Ключовым елементови у телефонови была карта памняти на 512 меґабайт, што ишла такой у комплектови до телефона тай позволяла вам держати у жебови такой усю гудьбу, яку сьте з собов мали. Телефоны сиї серії мали май яркый дізайн и проґрамноє напарованя, націленоє на музику.

Окреме вартує спомнити и за наушникы HPM-70, котрі йшли в комплектови. У тоты рокы телефоны в бульшости не мали 3.5-міліметровый авдіо-„джек“, та могли ся пудключати лиш тоты наушникы, што йшли до них в комплектови. Серія Walkman была інтересна якраз тым, ож давала вам у комплектови наушникы з такым переходником, куды сьте могли задіти хоть-яку другу апаратуру, котра ся паровала из сим розйомом.

Кроме просто доброго звуку, ушыткі телефоны серії Walkman (тай подаякі поза сив серійов) мали інтересні брендові проґрамы:

• MusicDJ — проґрама на компонованя MIDI-авдіотрекув из бібліотекы встроєных семплув.
• TrackID — проґрама на ідентифікацію музикы, аналоґ Shazam: накручуєте дараб пісні тай ся дузнаєте за ниї інформацію — тко автор, як ся вна кличе, з котрого албума и так дале. Айбо на удлику уд Shazam, котрый товды щи накручовав авдіо через звонкы, а пак заганяв SMS из найденов пісньов, TrackID быв установленый на телефон.

Cyber-shot

Сесе брендовоє имня, руно ги спередущоє, мало вже свою історію пуд крылом Sony: зачинаючи з рока 1996, фотолюбителі з усього світу знали фотокамеры сього бренда. А выбух популарности камер у телефонах зробив дуже чеканов и лоґічнов провбу Sony Ericsson схрестити сесе у єдну серію —што у них выйшло непудло.

Першыми телефонами серії Cyber-shot были K800i и K790i, котрі ся націльовли якраз на максималный потенціал камеры. Каждый телефон сиї серії мав автофокус, ксеоновый заблиск („вспышку“), окрему ґомбичку на фотьканя на корпусови збоку (руно гикой у посправдішньых фотокамерах), не кажучи вже за такі преміалні річі, за котрі в тот час другі бренды и не думали — упознаваня лиця тай автофотьканя на усмів.

Мож сміло уповісти, ож што ся докыват фотокамер, та Sony ся на тому знали дуже добрі. У середині 2000. рокув серія Cyber Shot майже не мала конкуренції помежи мобілными телефонами, у тот час лишек елітні моделі другых брендув могли так-сяк ся поміряти силами з камерами Cyber-shot. Бульше того, якраз зачинаючи з сьої серії, многі люди перестали думати за тото, обы си куповати окрему цифрову камеру. Автор публикації має у старых фотоалбомах надруковані фотькы, наклынцані якраз на тот K550i, и ниґда бы сьте не уповіли, ож тото ся знимковало на бюджетный телефон.

Вартує спомнити

Кроме поєдных моделюв, за котрі ся говорило высше, сут ищи дакотрі, котрі ся навхтема обстанут у серцях людий по всьому світу. За них и спомниме.

• Модель K750i — ачей майлеґендарный спомежи всьых телефонув сього бренду. Фірма продала бульш як 15 міліонув сих направ за два рокы (2005–2006), што є дуже серйознов цифров, аж поникати на общі цифры продажу телефонув. Хоть сесе быв не Walkman и не Cyber Shot, но 750i мав у собі всього доброго по крыхті. Серйозна камера, читавый звук, перфектна кваліта фізичного напарованя, Bluetooth, голосна музика, но тай довга робота уд батеркы. Сесе быв посправді тріумф в історії бренду Sony Ericsson.
• T610, презентованый у рокови 2003, став зачатком еры успіху Sony Ericsson, и быв посправді револуційным на свуй час. Стучный дізайн, камера, доста великый цвітный дісплей на свуй час, 2 меґабайты встроєного міста, камера на 0.3 меґапікселюв, пуддержка широкого діапазона аплікацій (и бавок) на платформах Java ME тай Mophun.

• Sony Ericsson W980 — „жабка“, презентована у 2008, котра мала у собі онь 8 ґіґабайт встроєної памняти! Могла у собі тричі умістити всю музику, котра у ня была в тоты рокы. Кроме доста чеканых уд бренда стілного дизайну и доброго „желіза“, W980 мала и характерні діла тої серії ґомбичкы на управліня музиков.

• С905, выпущеный у рокови 2008 быв вершинов того, што сьте могли чекати уд „камерафона“ у тоты рокы. Мав у собі читаву матрицю на 8.1 меґапікселя и дізайн из высувнов клавешницьов, даючи бульше міста на дісплей — а значит и на розникованя фотьок. З інтересного мав у собі GPS-модуль, котрый муг такой теґовати локацію у фото — задовго до того, як тото стало привычнов функціов смартфона!

• Xperia Play – мож было чекати, ож фірма Sony буде мати дяку перенести на сеґмент мобілных телефонув не лиш свою скушеность з музиков тай камерами, но и популарность Play Station. Сеся модель, выпущена у рокови 2011, была якраз тым, на што похожа — схрещеным Play Station и телефоном. Образовка на 4" давала доста простору на бавкы, панель пуд нив была „ґеймпадом“, а процесор на 1 ґіґагерц побировав бы хоть-яку мобілну бавку того часу. Не позираючи на такый фокус на бавках, телефон не поступав ся свойим „братчикам“ и в другому напарованьови: мав читаву камеру на 5 меґапіксельох, стучный дізайн, нівроку памняти. Єдно лиш, што му хыбіло — слаба пуддержка уд комуніты розробникув; не могли сьте на нього найти онь так много новых бавок, обы было оправдано го куповати. Айбо наприклад ипен на Xperia Play у свуй час выйшов и недовгый час пробыв ексклузивом Minecraft: Pocket Edition (мобілна верзія Minecraft).

Путь удолину

Но та кедь усьо было так парадно, та чом днеська не видиме телефоны бренду Sony Ericsson на полицьох у бовті? Де ся діли?

Не буде вам чудно ся дузнати, ож Sony Ericsson стали руно на тоты граблі, што и многі другі популарні в тот час бренды — не готові были до „револуції“ смартфонув. В єден момент по презентації Apple iPhone, японсько-шведськый конґломерат не устиг доста шіковно розвернути шіфу, обы зачати розробляти свої смартфоны. Sony Ericsson банално не устигли ся адаптовати, хоть и мали непудлі провбы попытати сеґмент комунікаторув, но телефоны серії P (гикой P900 авадь P910) были обєктівно слабі попри прямых конкурентув уд Nokia в тоты рокы.

Не мож уповісти, ож бренд домак забыв за исю гонитву; они пак у 2010. році выпустили смартфон на Android — Sony Ericsson Xperia X10, добру, но не безпроблемну направу. Основнов бідов быв якраз час: смартфон выпустили на Android 2.1, в тот час, кой конкуренты вже в бульшости мали девайсы на Android 2.2. Обнова до верзії 2.3 в середині 2011. рока не дуже спасла ситуацію.

В тот самый час Sony Ericsson пробовали и дале выпущати смартфоны на Symbian OS, гикой Sony Ericsson Vivaz, домак сліпо не видячи, ож торг телефонув уже поклав хрест на туй операційнуй системі. Сесе была провална авантюра.

Якраз у кунци 2000. рокув, кой бум смартфонув зачав трясти ієрархічным деревом выробникув телефонув, партнерська структура японцюв и шведув зачала ся розпукати. Партнерство, котроє принесло їм успіх на самому зачатку, в супокуйнуй гавани непытаных технолоґій, теперька зачала гамовати адаптацію до новых условій. Зкурта — японці и шведы мали дуже инчакі назоры на тото, як ся треба адаптовати ид ері смартфонув, спозад чого дуже ся запоздили из Android, и профітькали свою репутацію помежи потенційными куповачами.

Як резултат такых потрясінь, доходы фірмы зачали падати. У рокови 2010 Sony Ericsson заробили 90 міліонув евро, айбо вже у 2011 мали 247 міліонув у мінусови. По такому фінансовому потрясіньови тяжко устати на ногы, тай Sony Ericsson так и не встали.

Сесе быв кониць успішного партнерства, у 2012. рокови Ericsson продали свою половку фірмы японцям за 1.05 міліардув евро, што на тот час узирало дуже скромнов цифров — гибы шведы ся просто хотіли по тихому знебыти ганьбы. Японці продовжили выробу мобілных телефонув пуд брендом Sony Mobile Communications.

Што там днеська?

Зачинаючи з рока 2012, кой Sony повностю взяли пуд своє крыло сеґмент мобілных телефонув тай смартфонув, они продовжили фокус на тому, на чому ся майліпше знали — забавити куповача. Подалші смартфоны ся выробляли з акцентом на дізайн, камеру, мултімедію.

Серія Sony Xperia продовжила жыти, дуставала компліменты уд експертув за перфектну камеру, добрі образовкы, и преміалный дізайн. Правда, за преміалным дізайном пушла и преміална ціна — смартфоны Sony стали з часом на порядок май дорогі выд свойих конкурентув и почти домак пропали из сеґмента середньої и доступної ціны, спозад чого дуже силно упав и процент торга, котрый занимат фірма.

За минулый гуд, а тото 2025, фірма Sony залеґдвы взяла 1% торга смартфонув, што робит їх будучность у сюй сфері доста каламутным. Хоть у самуй фірмі кажут, ож не бизувут ся тегетовати конкурентам и будут ся змагати и дале робити квалітні смартфоны, даже кедь ся убстанут у дуже малуй ніші преміум-смартфонув.

В тот самый час шведська Ericsson вернула ся „ид коріньом“ — телекомунікаційным технолоґіям. Европська половка бывшого Sony Ericsson бульше ся не бизовала мачати перст у мобілні телефоны, но продовжила роботу у інфраструктурі 4G тай 5G сітьох, уєдно з проґрамовым напарованьом про них. Та хоть шведы вже не роблят ипен телефоны, но они навхтема ся убстанут дотычні до телефонної інфраструктуры.