Twitter дасть вам зкомбіновати рӯзноє медіа у єдному твітови

Ушыткі хосновачі iOS тай Android типирь можут потестовати новинку ай самі, попробувучи прикапчати пару тіпӯв медіа до єдної публикації. Таку опцію запримітив быв єден проґрамный інженер (Alessandro Paluzzi) щи у Апрільови місяцьови, а фірма Twitter у Юлійови місяцьови пудтвердила, ож айно, ож роблят над такым функціоналом. До того могли сьте капчати медіа лиш єдного тіпа.

Уже типирь можете просто клынцнути на іконку фотокамеры у своїв аплікації тай прикапчати тот тіп медії, котрый хочете. Выбрані дарабы медіа укажут ся у шорика, руно так, гикой ото усе фунґовало из подобенками. Можете поникати як ото вызират у готовых твітах туй.

Гикой видиме выще, інтеґровані спередпозираня твітӯв на другых платформах раз не бере ушыток испис медіа, ай лиш первоє, што маєте там закрїпленоє. Но исе ся, бизӯвно, поладит из часом.

Не позиравучи на фурташні конфлікты тай шкандалы из Ілоном Маском, што бизує ся купити платформу, Twitter не перестає розробляти новый функціонал тай дакуды ся кывати.

Жерело: The Verge