У Twitter обновили правила, заказали хоснованя алтернатівных аплікацій

Бӯлш не мож буде хосновати Tweetbot, Twitterific, Tweetdeck авадь Flamingo.

Фірма Twitter обновила правила про розробникӯв, де типирька можете вычитати, ож хоснованя другых клиентовых аплікацій заказаноє. Правила ся обновила дас через тыждень пӯсля того, як сервіс заблоковав быв доступ до подакотрых вонковых аплікацій.

У обновленых правилах ся пише, ож розробникы не можут хосновати API авадь контент фірмы Twitter «обы сотворити заміну аналоґічного сервіса/аплікації Twitter». Кидь накурто – заказано создавати алтернатівні клієнты Twitter, котрі бы ся капчали до йихнього API тай контента.

Є гіпотеза, ож єднов з причин, чом ся ся стало, годни просто быти гроші. Послїднї місяцї, пӯсля того як фірму купив шкандалный бізнесмен Ілон Маск, фірма має серйозні репутаційні тай фінансові проблемы. Многі розробникы алтернатівных платформ платят за доступ до API Twitter, айбо через нього не передає ся реклама, што силно занижує можностї фірмы монетизовати доступ через вонкові сервісы. Так само хосновачі алтернатівных клиентӯв не заінтересовані куповати Twitter Blue, котрый розшырює функціонал лиш офіційної аплікації Twitter.

За сяку зміну не было ниякых выголошень навпереда, но сесе ани не чудно, бо з недавнього часу Twitter бӯлше не має уддїла на комунікацію из обществом.

Жерело: