WWDC 2023: головноє из презентації Apple

6. юнія 2023. рока Apple указали презентацію WWDC23 (Worldwide Developers Conference 2023), на котрӯй мали сьме можнӯсть увидїти, над чим компанія робила сись рӯк.

iOS 17

Зачинавучи з iPhone XR тай iPhone XS, смартфоны Apple дӯстанут обновлїня до iOS 17 (исе значит, ож iPhone 8, iPhone 8 Plusтай iPhone Xся обстанут на iOS 16). Уже є бета-реліз про розробникӯв, у слїдувучому місяцьови выйде публічна бета, а в осени буде повноцїнный реліз сьої верзії iOS.

Из інтересных новых функцій мож уповісти за Contact Posters — можнӯсть персоналізовати екраны, котрі видите, кой вам звонит датко з контактӯв. Кроме того, ож типирь фотька контакта авадь йихньый Memoji-аватар будут ся указовати на вшыток екран, туй, ги на заблокованому екранови, мож захосновати ефект глубины, обы фотька контакта перекрывала подакотрі текстові елементы, а щи міняти барвы тай шріфт про имня контакта. Про «голосову пошту» по-анґліцькы типирь є транскріпція у реалнӯм часї. У обновленому FaceTime мож лишати відеоуповісткы.

iMessage дӯстав вылїпшеноє гляданя, можнӯсть заганяти локацію, «свайпом» удповідати на уповісткы тай скоро скакати ид первӯв непрочитанӯв уповістцї.

Нова функція Check In позволяє держати файту тай близькых у курсї за вашу ґеолокацію, обы они знали, ож исьте ся безпечно дӯстали до хыжі. Check In буде знати, ци сьте ся споздили тай знає давати убраным людьом голошіня, указовати їм статус вашої батеркы тай сіґнала про мобілні податкы.

AirDrop типирь має функцію, из котров обміньовати ся контентом мож приклавши свӯй iPhone ид другому (доста похожоє на обмін через NFC, котрый быв приступный, приміром, на девайсах Sony), переписованя податкӯв годно си ити на позадинї, а щи є можнӯсть дїлити ся контактными податками через функцію NameDrop.

Клавешниця тай надіктовованя голосом дӯстали «апґрейд»: они типирь хоснувут новый языковый модел, котрый буде у тӯм числї ся учити на вашому писаньови, обы май трїбно управляти ваш текст, кидь маєте включеный «автокорект».

Щи iOS 17 принюс нову аплікацію Journal — она фунґує ги ваш личный дньовник, куды сьте годни записовати свої думкы вадь імпресії за динь, давати туды фотоґрафії, людий, музику, котру сьте слухали, локації, котрі сьте навщивляли. Мож у нюв ай покласти каждоденноє напоминаня дашто «зажурналовати».

Послїдньоє, за што варта написати — режім StandBy, похожый на Android-функцію Always On Display. Сись режім позволяє вам лишити у горізонталнӯв позіції ваш iPhoneиз фурт уключеным екраном, на котрому буде інформація за час, дату, музику, фотькы тай другоє (хосновач годен сам собі зобрати свӯй StandBy-«експірієнс», додавучи на удповідный екран віджеты). Голосову асістентку Сірі у режімови StandBy мож узвати просто вповівши «Сірі», не мусай казати «Гей, Сірі».

iPadOS 17

В основному у iPadOS 17 будут такі ипен новоуведеня, ги у iOS 17, айбо не лиш: буде ай дакӯлко «ексклузівных» вылїпшень про мало май великоекранні девайсы, котрі ходят на сюв сістемі. Даты релізӯв такі, ги у iOS 17.

Напервоє, віджеты станут інтерактивными, а заблокованый екран буде май хосенным тай дӯстане пӯдпору Live Activities (а щи його мож буде персоналізовати так, ги на iPhone). Мож буде уключати до 4 таймерӯв, каждый из котрых увидите на заблокованому екранї. Аплікація «Здоровля» появит ся на iPad.

Робота из PDF-файлами стає щи май комфортнов: буде автоматичноє спознаваня фраґментӯв, котрі ся жадат заповнити, а у аплікації «Записы» мож буде придавати дакӯлко PDF-файлӯв ид єдному записови тай робити над нима врокаши через Live Collaboration. У Freeform межи тым додадут нову серсаму.

macOS 14 Sonoma

Операційна сістема про компютеры Apple тоже дӯстала обновлїня, котроє у тому числї принесло многі функції из iOS тай iPadOS. Бета про розробникӯв уже приступна, публічна бета ся появит у юлійови, а повноцїнный реліз буде в осени.

14. верзія macOS є вінована долинї Сонома у Каліфорнії, знамӯв ги сердце виноробної індустрії штата тай містом, де у рокови 1996. Чарлз О’Рір учинив єдну из ачий майзнамых фотоґрафій у історії — «Блаженство»/«Буколічні зелині горбы», котру многі тямлят ги стандартну позадину у Windows XP.

У сюв верзії ся появлят відеозаставкы, котрі будут помалы ся тягнути через красні ландшафты из рӯзных локацій.

На робочому столови мож буде розкладовати інтерактивні, адаптивні віджеты, котрі ся будут приглушовати, кой хоснуєте даяку проґраму, обы вас не удрывати выд роботы.

У macOS Sonoma ся появит бавковый режім. Хоть ґеймінґ ниґда не быв силнов сторонов Apple, сякі кываня у бӯк бавлїня на «яблыках» стали можными дякувучи процесорам серії Apple Silicon. Бавковый режім дає пріорітет бавцї, заберавучи ресурсы у другых процесӯв. На презентації ся появив знамый ґеймдізайнер Хідео Коджіма, обы обявити, ож у сьому рокови на Mac выйде Death Stranding Director’s Cut.

Пӯдчас вашых презентацій на такых платформах, ги Zoom тай FaceTime, буде вылізати спеціалный оверлей, де будете годни видїти зворотный зъязок, а позерачі зможут давати інтерактивні реакції.

У Safari мож буде учинити профілы, котрі роздїлят історію тай «кукі», обысьте могли легко выддїлити роботу тай личні дїла, вадь учинити уддїлный профіл про каждого хосновача компютера. Сайты мож перечиньовати на псевдо-нативні проґрамы через функцію WebApp.

MacBook Air 15.3”

У свіжый MacBook Air из дісплейом Liquid Retina тай без активного охолоджіня поклали процесор M2, акумулатор, трїбный проробити до 18 годин. Apple заявлявут, ож сись новтбук дванадцять раз май скорый ги MacBook Air из процесором выд Intel.

Mac Studio

Новый компютер Mac Studio, нацїленый на тых, кому треба скорый тай моцный, айбо компактный Mac, буде мати процесоры серії M2, а кидь май точно, та вӯн ся годен похвалити выбором межи M2 Max тай M2 Ultra.

Apple Silicon + PCIe

Новый Mac Pro буде мати насвіжо анонсованый процесор M2 Ultra, завершит переход Apple на свої процесоры Apple Silicon тай споит скороту майлїпшого на днишньый динь «яблычного» чіпа из універзалностьов PCI Express.

Софтверноє обновлїня про AirPods 2. ґенерації

Наушникы Apple дӯстали функцію «Адаптивноє авдіо», котра фунґує ги комбінація «Шумоподавленя» тай «Прозрачности» тай розумно переключає ся межи сима двома режімами, коли вам тото треба.

Режім «Бисїды» автоматично учинит музику май тихов, кой учує, ож вы з дакым приказуєте, тай изфокусує на вашому бисїдникови режім «Прозрачности».

AirPlay типирь буде запоминати, коли, де тай котрі AirPlay-девайсы хоснуєте, обы вам навперед їх понукати у такых сітуаціях.

tvOS

Контролный панел на Apple TV став май стӯчным, а ваш iPhone поможе вам найти пулт Siri Remote. На Apple TV ся появлят FaceTime тай функція про колективноє позераня SharePlay.

watchOS 10

watchOS 10 має обновленый інтерфейс, Smart Stack, котрый буде указовати трїбні віджеты товды, кой йих треба, тай нові ціферблаты. Появлят ся нові функції про біціґліштӯв, тенісіштӯв, ґолфіштӯв тай тых, тко ходит у походы. Нова аплікація даст хосновачам записовати свої моменталні емоції тай дяку, котру они мали за динь.

Vision Pro

На презентації першый раз указали Vision Pro — компютер-ґарнітуру доповненої тай віртуалної реалности.

На удлику выд многых VR-ґарнітур, Vision Pro вызират доста компактно, тай скорше всього не буде дуже тяжкым девайсом. Про тых, тко носит очкы, будут спеціалні вкладкы, розроблені у партнерстві из Zeiss. Владкы ся будут продавати окреме тай за рецептом. Батерка Vision Pro пудкапчана шнуром, зато мож ї покласти у жеб авадь ташку. Уддїлных контролерӯв у девайса ниє — ґарнітура ся управляє голосом, руками тай очима.