Jul 12, 2025 Новостї

YouTube не буде монетізовати ШІ-контент

Зачинавучи из 15. числа юлія місяця відеогостінґ уводит читаві зміны у правила монетізації.

Такоє рїшеня мож трактовати як малу зміну, а мож трактовати и як зачаток май великого зсува. Раз за сесе мож лиш шпекуловати.

У YouTube уповіли, ож хоть сперед сим фурт начисто ся казало, ож посправдїшньый тай ориґіналный контент фурт быв основнов вымогов для партнерської проґрамы (метод монетизації вашых відей), исе обновленя правил має уточнити, якый тото контент не є «посправдїшньым» тай «ориґыналным». Сякый крок платформы, видко, є реакційов на читавый рост числа каналӯв, котрі кладут на первоє місто масовость и число прониковань, а не ориґіналность йих відей.

Даякі основні моменты, што ся докывавут не ориґіналного контента:

Контент узятый из другых міст з мінімалными змінами. Просто замінити скороту відеа, обтяти відео, авадь добавити музику на фонови не буде ся раховати доста великов змінов. Контент мусит быти трансформованый у достатнюв мірі, обы новоє відео раховало ся ориґіналным.
Повторьованый контент без ясної цїлї. Відеа, штамповані за єднов мінтов, особено у куртых відеах (shorts), котрі ничому не учат и не пробувут завгурити авдиторію.
На скору руку зґенерованый ШІ-контент. Хоть YouTube не блокує зґенерованый ШІ-контент домак, айбо відеа котрі ся читаво спиравут на ґенерацію (зґенеровані образчикы из такой зґенерованов озвучков) без хоть-якої замітної участи у відеови живых люди, будут пуд великым ризиком убстати ся без монетізації.
Клікбейт тай спам. Відеа, котрі нароком обманювут позирача «голосными блискачыми» образчиками, обы закапчати йихню увагу, при тому не мавучи у собі нич рядного, тоже годни быти демонетізовані.

Сякі зміны у політицї YouTube нацїлені на всокоченя довіры як фурташньых творцюв контента, великых «ютуберӯв», так и рекламодавачӯв. Закидь є возможным сотворити канал и розогнати го до великых маштабӯв не прикладувучи ниякої живої роботы, а сполїгати ся лишек на зґенеровані ШІ и голос, та реалні творцї контенту будут утрачати мотивацію дашто домак чинити. В тот самый час рекламодавачі бых раді давати гроші, обы йих реклама ся указовала на квалітных «живых» відеах, а не на зґенерованӯв начитцї публікації з Reddit на фонови паркура у Minecraft.

За куртым гляданьом мож найти стӯвкы інструкцій, як шіковно зачати зарабляти, ґенерувучи ШІ-контент.

Проблема из ориґіналным контентом на YouTube не появила ся вчора, долиш из появов ґенератівных ШІ она ся читаво усугубила. Ужек не первый гӯд платформа є перенасычена контентом тіпа «реакцій», де єдні люди позиравут відеа другых люди и даяк тото коментувут. Стало слїдно даже помежи дуже популарными «реакторами», ож такый контент не є, гикой кажут у YouTube, зміненый доста, обы мати цїну сам уд себе.

Май читаво за сяку проблему став войотити ютубер jacksfilms, котрый в удкрыту сміховав ся из того накӯлко лїниво и низькоквалітно ріхтувут свої відеа такі «реакторы», гикой наприклад SSSniperwolf. Дӯйшло до того, ож вӯн сотворив пародійный акаунт JJJacksfilms, де вӯн на практицї провказовав слабі міста такого филя контента и крітіковав як SSSniperwolf, так и другых великых ютуберӯв-реакторӯв, помагавучи май малых творцям контента писати офіціалні письма у YouTube, обы платформа авадь зняла монетізацію, авадь забрала відеа, котрі «реакторы» украли без поволіня и зараблявут на тому великі гроші.

Відео десятьрӯчної давности, де jacksfilm робит відео-реакцію на другого «реактора», котрый никат такой його відео.

До сього YouTube были доста благі на подобный филь контента и забирали монетизацію у великых «реакторӯв» лиш подаколи. Но з появов такої серсамы як ґенератівні ШІ стало до смішного легко робити «лїнивый» контент низької якости у читаво великых маштабах — и зачав ся тиск на відео-ґіґанта не лиш из бока творцюв контенту, но и з бока рекламодавцюв, на што вже май тяжко закрыти очи.

Які ипен будут крокы из бока YouTube, буде видко уже по 15. числови. Раз из обновленых правил монетизації не є добрі видко де буде тота межа, за котров контент буде раховати ся достаточно ориґіналным, аж кидь и має у собі зґенеровані елементы, гикой звук авадь образчикы.