Dec 16, 2022 Новостї

Apple выпустила Freeform — свӯй інштрумент про брейнштормінґ

Приступный на iOS 16.2, iPadOS 16.2 тай macOS Ventura 13.1.

Купертінӯвська компанія рїшила тоже попровбовати осїдлати габу популарности «ціфровых дощок» — пӯсля того, як Figma вєдно из сервісом FigJam за $20 міліардӯв купили Adobe, а сервіс про артборды Miro дӯстав $400 міліонӯв інвештіцій.

У майсвіжых верзійох iOS, iPadOS тай macOS появила ся аплікація Freeform — ціфрова дощка про совмістну роботу тай ґенерацію ідей. Серсама поволяє хосновачам робити на єдному полотнї, обговорьовати ідеї тай рїшеня, вкладати файлы тай проникововати йих не выходячи из дощкы. Freeform має інтеґрацію из FaceTime, а дощкы, учинені у ньому, автоматично ся сінхронізувут из iCloud.

Полотно, на котрому иде творчый процес, безконечноє — оно ся розшыряє бігом того, як вы на нього докладаєте свӯй контент. Удну вас чекат комплет рӯзных пензликӯв тай барв, обысьте ся не ограничовали, кой зарисовуєте ідеї. Про май легку навіґацію полотном сут жесты.

На дощкы Freeform мож прикапчовати образчикы, відеа, авдіа, документы, PDF-файлы, удкликованя на вебсайты, ґеолокації, цидулкы, ушелиякі ґеометричні фіґуры, діаґрамы — документы при тому мож скеновати такой камеров iPhone авадь iPad. Межи функціями Freeform сут ай хосновачські фіґуры, котрі мож всокочовати тай пак перехоснововати.

Freeform пӯддержує drag’n’drop: контент из другых аплікацій мож перетяговати на полотно тай легко держати парадно зорґанізованым дякувучи встроєным линійкам. Функція Quick Look поволит хосновачам передпозерати медіаконтент двома тапами.

На єдно полотно мож додати до 100 спӯвавторӯв. Дякувучи інтеґрації из FaceTime мож зачинати колективні звонкы прямо из Freeform, а інтеґрація из Messages поволяє додавати чилядь просто перетягувучи дощку у чет — ушыткі його участникы моментално дӯстанут закликаня тай годни будут нараз зачати робити з вами. У сякому припадї зміны, внесені другыми хосновачами, будут ся выписовати ай у чет Messages.