Атомна батерка: смартфон 50 годӯв без пудзарядкы
Кітайськый стартап Betavolt хвалит ся, ож создав перву безпечну атомну батерку.
У Betavolt кажут, ож они первыми у світови реалізовали таку мініатюрну тай моцну атомну батерку. Йих модуль, из ізотопом Нікель-63, не є бӯлшый выд копійкы.
За словами розробникӯв, батерка слїдуючого коліна, BB100, што мала бы бировати служити 50 годӯв без пудзаряжованя, ужек перейшла до фіналных етапӯв тестованя, тай скоро буде ся выробляти масово про комерційный торг. Из таков батерков мож буде чинити смартфоны авадь дроны.
«Атомні батеркы Betavolt станут серцьом шелиякої мікроелектронікы у многых промыслах, гикой аерокосмічна електроніка, матаржиня из ШІ, лїкарськоє матаржиня, мікропроцесоры, всякі датчикы, невеликі дроны тай мікророботы» – кажут у пресрелізови фірмы.
Перва атомна батерка розмірами 15x15x5 міліметрӯв буде давати до 100 мікроват моци из током у 3V. Компанія планує выпустити батерку на єден ват до 2025. года.
Многослойна конштрукція BB100, за словами Betavolt, буде безпечна, не мала бы выбухнути авадь самозагорїти ся, гикой тото пораз сохтувут літій-іонові батеркы, тай мала бы робити у температурных діапазонах выж -60°C до 120°C.
«Атомна батерка Betavolt є абсолутно безпечнов, не має силної радіоактівної зарї на вон, файно парує на хоснованя лїкарськых матарґах, гикой у кардіостімулаторах ци штучных серцях удну людського тїла» – кажут у фірмі.
Betavolt кажут, ож батерка є еколоґічно чиста, бо компоненты їв перечинювут ся на стабілный ізотоп мідї, котрый не є радіоактівным, тай не буде загрожувучым людьом авадь природї.
Жерело:
Anthony Cuthbertson
