Sep 7, 2022 Новостї

Бразілія не дасть продавати нові iPhone без зарядкы

Уряд державы прийняв радікалноє рїшеня. Фірма Apple планує правити ся у судови.

Щи у рокови 2020. фірма Apple дорадила ся не давати зарядку до новых телефонӯв у комплектови, спозад чого вже тогды зачали ся діалоґы из реґулатором бразілського уряду. Но типирька реґулатор домак заказав продавати нові смартфоны без зарядкы у шкоробыни на території державы. За исе ся казало у выголошіньови міністерства юстіції тай громадської безпекы Бразілії.

У додачу ид заказови продаж iPhone без зарядок, реґулатор тручат фірму Apple заплатити штраф великый аж 12 275 500 бразілськых реалӯв (изгруба 2.3 міліона доларӯв ЗША) тай зрушив сертіфікацію iPhone 12 локалным телеком-реґулатором Anatel.

Ачий не нагода, ож сякоє выголошіня за заказ продавати iPhone без зарядкы учинили за динь до презентації Apple Far Out, де буде презентованый iPhone 14 (ачий тоже буде без зарядкы у шкоробыни). Хоть iPhone 12 щи мож видїти доступным из Бразілії на офіціалному сайтови Apple.

Щи на зачаткови рока 2021. реґулатор Бразілії наклав штраф на фірму Apple великый аж 2 міліоны америцькых доларӯв за продаваня iPhone без зарядкы. Арґументовали тым, ож фірма не учинили нич, обы мінімізовати додаточні розтраты хосновачӯв. У фірмі Apple сякый крок поясньовали провбов усокотити еколоґію тай продуковати менше смітя, а не обы додаточно зарабляти на зарядках, но на крітіку реґулатора Бразілії раз публично не реаґовали. А уже днись рїшеня бразілського уряду дӯстало моменталну реакцію — представник фірмы Apple у інтервю Reuters уповів ож будут подавати апелацію, тай бизувут ся выйграти.

Кроме зарядкы не найдете у шкоробыни из iPhone ай проводных наушникӯв. Фірма Apple уже мала конфлікты из другыми реґулаторами спозад сиї причины. Франція заставляла Apple продавати телефоны сугубо из наушниками у шкоробыни, бо така была вымога законодавства. Но тота вымога была зрушена на зачаткови рока 2022. та уже днись наушникы из новым iPhone не дӯстанете.

Тоже варта спомнити, ож уряд ЕУ реґламентовав мусайноє хоснованя гнїзда USB-C у будучных смартфонах, планшетовых направах, фотокамерах, тай другӯв друбнӯв техніци, обы уменшити продукованя смітя выд нагромаджіня рӯзнотипных шнурӯв. Тоты правила зачнут фунґовати у рокови 2024. Бразілія тоже тягне ся у бока порта USB-C дїла ушыткых девайсӯв.

Нагадуєме, ож уже было чути, ож фірма Apple хоче ся выдказати выд свого фірмового гнїзда Lightning тай перейти на USB Type-C.

Жерело: