Будучні Lenovo ThinkPad будут легші в ремонтови

Недавня выставка модерної технікы (MWC 2024) провказала нам читаво всякого інтересного, могли сьте видїти, наприклад, преповно новинок за новтбук Lenovo из ерканом, крӯзі якый ся видко.

Но редакції Інтерфийсы бӯлше упало в око дашто другоє, представленоє Lenovo — убновлена серія ThinkPad: T14 Gen 5, ThinkPad T14s Gen 5, тай ThinkPad T16 Gen 3. За первоє вартує спомнити читавоє уднушньоє напарованя: ушыткі направы дӯстанут процесоры Intel Core Ultra послїднього колїна, а T14 буде мати щи алтернатівный варіант — AMD Ryzen 8040.

Зміну дӯстали и клавешницї. Ґомбы Fn, Insert, Enter тай управлїня голосом дӯстали фізичноє маркованя, обы помочи незрячым людьом напытати (ци варта казати, ож и зрячым сяк буде май стӯчно). Попиля того, забрали ґомбу Fn из лївого нижнього угла, вернули туды Ctrl, котрый найдеме и нараз злїва пиля навіґаційных ґомбичок. Из важныз новинок вартує спомнити и за нову ґомбу, котра буде пущати Copilot — віртуалный ШІ-помочник уд Microsoft.

Но майвелика радӯсть сього убновленя серії — простота у полажованьови.

Фірма Lenovo насерйозно робила даякый час из фірмов iFixIt, обы бизовати свойих куповачӯв, ож купленый новтбук они побирувут поладити самі (маймало, кой треба просто выміняти даякі компоненты). Резултатом сього стало навертаня ид повноцїным слотам на памнять. Нагадаєме, ож спередущоє колїно ThinkPad мало розпаяну на материнськӯв платї оперативну памнять, што значило, ож заміна планкы была читаво дорогым тай технолоґічно тяжкым процесом. У новӯв лінії новтбукӯв заміна ся буде годна учинити за пару минут, без потребы дашто паяти.

Попри сесе, кидь ся из сяков техніков читаво не знаєте, попри каждый компонент удну новтбука найдете QR-код, котрый вас приведе на детайлну інштрукцію, ож што сесе тай як ся знимат. Та даже без серйозных технічных навыкӯв побируєте выміняти у направі батерку авадь SSD.

Сякі зрушеня уд серйозных брендӯв, гикой Lenovo, давут добру надїю на тото, ож хосновачська техніка в будучности не буде ся вышмарьовати у смітя пӯсля першої фізичної хыбы, а направду побирує служити вам годами, будете валовшні не тяжко ї зріхтовати.

Lenovo worked with iFixit to make some ThinkPads easier to repair

There’s also a Copilot key. Cool?

The Verge