Фірма Apple запатентовала концепт розкладного iPhone
Патентовоє бюро товарных знакӯв ЗША сього тыждне выдало патент и на розкладный iPhone.
Новый концепт, позиравучи на документацію, мав бы мати сенсоры такой по всьому корпусови, на управліня голосом, світлостьов, бавками, тай так дале.
Перва ілустрація, котру можете видїти высше, была придана дізайнером из Купертіно уєдно из патентовов пожадавков, зображат направу дуже подобну на розкладный iPhone из датчиками по всьому корпусови. Головна ідея у тӯм, обы хосновач мӯг управляти направов не удкрывавучи ї.
«Годно быти, ож тяжко буде изкапчати управліня тай зображіня інформації хосновачови. Наприклад, кой хосновач ся дотыкат ид екранови, та такой його рука може блоковати тото, што ся указує на екранови», – каже ся у додаткови.
У фірмі бизувут, ож сенсорні елементы управліня будут лїпше выд фізічных тумблерӯв. Бо потребы управліня направов можут ся міняти в залежности на став направы. Наприклад, кой девайс є изкладеный, та задню панель мож хосновати обы узяти телефон, як вам звонят, авадь збити. А вже у розкладеному исї елементы мож выключити гет, обы ненароком не актівовати дашто нетрїбноє, авадь перемістити даякі функції на бокы.
Так само тоту панел мож хосновати обы управляти музиков, закидь направа є складена: переключати ся помежи співанками тай міняти голос. Сись інтерфейс може ся дінамічно міняти на управліня дзвоніньом, кидь вам нагоду дзвонят.
Ідея патента розумлива тай файна, айбо Apple не обмежувут ся сим тай кажут, ож можут выхосновати такі сценары ай на направы, што ся не изкладувут.
Межи тым люди ся вже шепчут, ож новый iPhone 15 може ся убстати без фізічных ґомб на боковых панелах. Технолоґія Taptic Engine, при тӯм, буде імітовати фізічноє натиснутя на ґомбы, аналоґічно ид тому, як тото ужек фунґує из ґомбом «Домӯв» на iPhone SE тай на новых трекпадах MacBook.
Помежи чудными понуками — Apple видит можнӯсть сенсорного управліня бавками на тӯв заднюв панели. Но реалні сценары раз не ясні.
Не знаєме як стӯчно буде тото бавлячам, тай ци будут мочи ся шіковно перевчити на такі елементы управліня.
Головнов хыбов такої направы є тото, што независтло ци розкладеный ци изкладеный, телефон вам буде доста уразливым. Даякый чохол го, бизӯвно, буде годен усокотити, айбо у чохлови не будете мати доступа до тых функцій. Но не варта пиловати ся придумовати реалні сценарції до будучного смартфона выд Apple, бо ися конкретна ідея може ся так само убстати глубоко «у ладї», помежи другыми подобными нереалізоваными концептами.
Катерина Даньшина
