Фірма Intel мовчкы вертат пӯддержку продуктӯв у Росії

Многі хосновачі из Росії уповіли ож зась можут загружати проґрамы тай драйверы.

Фірма Intel мовчкы вертат пӯддержку продуктӯв у Росії

Гикой ся тямит, фірма Intel перестала была токмити ся из перепродавачами из Росії спозад санкцій, што наклали на державу США пӯсля інвазії Росії в Украйину. Руно так не мож было стягнути из йих сайтӯв ниякі фірмові проґрамы тай драйверы выд Intel у Росії. Но зачинавучи выд дниська доступ ся мовчкы поновив, проґрамы стали доступныма.

Пониже подаєме што выдказали у фірмі Intel на звіданя репортерӯв из Tom's Hardware:

У Фебруарови місяцьови року 2022. фірма Intel перестала заганяти продукцію у бовты у Росії тай Білорусї. У Апрільови того такой рока Intel анонсовали, ож мы не будеме дїяти тай токмити ся у Росії.
З того момента не было ниякых змін у нашӯв уднушнӯв політици, фірма Intel ай дале слїдує договреным правилам роботы из державами на котрі наклали санкції. В тому шорі сут ай Росія тай Білорусь. Доступ до такых ресурсӯв гикой Intel Download Center тай Intel Download Support Assistant сут доступні, бо тото частина ґарантійної догоды.

Жерела кажут, ож из зачатку, у Фебруарови, Intel направду заблоковали ушыткі ресурсы на стирьханя проґрам, айбо ближе до кӯнця минулого рока розблоковали доступ. Значит стало ся исе не дниська тай не вчора. У фірмі коментувут, ож сесе было мусайно спозад ґарантійных догод.

Стягованя проґрам было заблоковано 25. Фебруара рока 2022., тай было основано на локації хосновача. Спозад сього компанії тай хосновачі у Росії не мали доступа до стирьханя проґрам, тай надале хосновали авадь торрент трекеры, авадь VPN. Но дале хосновачі зачали ся жаловати, ож исе не согласовано из ґарантійными догодами.

Правда ситуація така, ож хосновачі не можут зайти на сайт Intel Russia, вӯн є заблокованый, та стяговати драйверы можут лишек через проґраму автоматічного обновліня драйверӯв.

Російська служба новинок CNews подає сесе у такӯм контекстови, гибы фірма Intel такой вертат ся на російськый торг, гибы вшытко ся вертат до нормалного доінвазійного ставу, хоть тото не є так. «Туй пахне пропаґандов» – зазначувут журналісты Tom's Hardware. У новинцї, на котру ся удкликує жерело, тоже ся споминат ай за «сїрый» імпорт товарӯв через другі державы, спозад чого создає ся ілузія ож Intel такой ладні зась торговати из Російов.

Но такый імпорт не є авторизованый фірмов Intel. Росія декриміналізовала такый «сїрый» імпорт удну державы, обы убыйти санкції такых вендорӯв ги Intel, AMD, Apple.

Жерело:

Intel Quietly Resumes Russia Support, Unblocks Software Downloads
Microsoft has also purportedly resumed Windows 11 Updates, too.