Фірма NVIDIA чекат зниженя дохода за квартал на 44%
Кроме того чекат ся ай зниженя цїн на серію відеокарт GeForce RTX
Гикой ся знає, моментално торг бавковых відеокарт, уєдно из усьым торгом компютерӯв, має читавый проблем, продажі падут долӯв. Фірма Nvidia, котра послїднї рокы мала рекордні заробӯткы, заходит на спад. Техноґіґант презентовав оцїньованя фінансового квартала, што ся кӯнчив минулый місяць, тай варує інвесторӯв, ож доходы за сись квартал будут ниже, спозад спаду продавань на усьых фронтах бізнеса.
За выслїдками другого кварталу у Nvidia чекавут лиш $6.70 міліардӯв, замісто перич проґнозованых $8.10 міліардӯв, што є на 19% май мало, гикой у первому кварталови, хоть и на 3% бӯлше другого кварталу гӯдтипирь. Головна біда туй у продаваньови відеокарт на бавкы – туй не дотягли до уровня минулого рока. Бавковый сеґмент фірмы фурт быв основным, што зарабляв гроші Nvidia, сього кварталу дӯстає лиш $2.04 міліарда, што є на 44% менше выд спередущого кварталу, тай на 33% менше гикой сись квартал гӯдтипирь. Исе кым май читавый спад (у грошох) спомежи усьых напрямӯв бізнеса Nvidia.
Попиля того выросли продажі девайсӯв дїла калкулаційных датацентрӯв – до $3.81 міліарда, што є на 1% бӯлше спередущого квартала, тай на 61% бӯлше ги сись квартал гӯдтипирь. Исе хоть мало зкомпенсовало фірмі утраты на основных торгах. Майвеликый процент прироста чекат ся на автомобіловому сеґментови – $0.22 міліарда, што є онь на 59% бӯлше гикой первый квартал тай на 45% бӯлше гикой гӯдтипирь. Усягде инде – індустрія паде долӯв.
Ґенералный діректор фірмы каже, ож сякый спад ся буде чути дуже читаво. Спозад сього у Nvidia уже ся ладят ид контр-мірам – будут знижати цїны на дакотрі серії відеокарт, тай вердут переговоры из основными партнерами. Хоть варта спомнити ож цїны ай попиля того уже упали на єдных 15-20%. У Nvidia не чекавут ниякого вылїпшеня ситуації.
Повный звіт буде опубликованый фірмов 24. числа сього місяця.
Жерело:
Володимир Скрипін
Коментарї () • Правила коментованя