Google належит половка трекерӯв у інтернетї

Ид сякым выводам прийшли у Lokker, кой писали майсвіжый Online Data Privacy Report.

Google належит половка трекерӯв у інтернетї

У документови з інфоґрафіков, про котру Lokker проаналізовали 170 000 сайтӯв, мож увидїти доста шокувучу статістику: самому лиш «Ґуґлови» приписувут 49.9% онлайн-трекерӯв! Айбо туй вартат спомнити, ож YouTube тай Doubleclick, котрі мавут 13.8% тай 8.3% выдповідно, тото дочірні компанії Google.

Щи єден тривожный факт: подля того иппен Online Data Privacy Report, 93.7% трекерӯв ото продукты техноґіґантӯв: Facebook кладе туды свої 15.7%, а Microsoft — 6%. Аналітичный сервіс Hotjar володїє 6.3% трекерӯв.

Сисї трекеры майчасто ся хоснувут на то, обы слїдити за тым, як чилядь бравзит інтернет, як клієнты взаимодїют из вебсайтами тай продукційов ушелиякых бізнісӯв, указовати май пӯдштімовану пӯд конкретного хосновача рекламу. Они зберавут рӯзну інформацію: выд IP-адресӯв тай установленых на девайсі шрифтӯв, за котрыма складат ся «профіл» хосновача («fingerprinting», 30.9% выд ушыткых тіпӯв трекерӯв) до выдтвореня дїйств, котрі на сайтї чинив навщивитиль («session replay», 35% выд ушыткых тіпӯв трекерӯв). Уже ни про кого не секрет, ож великі компанії знавут продавати сяку інформацію за свойих хосновачӯв рекламодатилям.

Бӯлш ги 11 000 скріптам, хоснованым на трекінґ, ногы ростут из крайин, знамых за свої недемократичні режімы тай гекерські атакы: Росії, Білоруси, Ірана тай Китая.

Многі модерні бравзеры уже доста давно «из коробкы» мавут інштрументы про блокованя трекерӯв: Firefox, Vivaldi, Orion, Opera, Brave.

Why The Web Browser Is A Company’s Greatest Vulnerability
LOKKER’s online data privacy infographic highlights the scope and scale of web privacy risks that exist and how to reduce them.