Google зоперли выробництво нового Pixelbook
Щи пару місяцюв типирь компанія думала домак по-другому.
Google зоперли выробництво нового Pixelbook, а вєдно з тым розпустили команду, котра над ним робила — члены того уддїленя перейдут у другі команды удну Google.
Послїдньым девайсом у сюв лінійцї став выпущеный у 2019. рокови Pixelbook Go.
Сякоє рїшеня не є онь чудным: торг «хромбукӯв» читаво поміняв ся выдколи на світ ся появив першый Pixelbook. Спеціфіка сих девайсӯв така, ож їх головно купувут про вошколованя, ги май дешеву алтернативу компютерам на Windows; при тӯм за послїднї рокы Acer, Asus, Dell, HP, Lenovo тай другі выробникы наплодили тӯлко много файных тай недорогых «хромбукӯв», ож Pixelbook из його моцным начиньом айбо высоков цїнов просто не найде си міста. «Хромбуковому» торгу уже не трїбна рука Google, обы му помагати.
Кроме того, CEO компанії Сундар Пічай уже не першый місяць каже, ож хоче упомалити процес найма новых кадрӯв тай порїзати подакотрі проєкты.
Межи тым, «хромбукы» ай дотипирь живі. Їхня популарнӯсть файно выростла у часї пандемії, кой габы школарӯв тай штудентӯв пӯшли ся учити онлайн тай глядали «жилїзо» на своє дістанційноє вошколованя. Товды «хромбукы» даже обыгнали за продажами компютеры Mac уд Apple — за йсе писала аналітична фірма IDC. А подля податкӯв фірмы Canalys межи першов четвертинов 2020. тай 2021. рокӯв популарнӯсть девайсӯв на ChromeOS выростал на 275%.
Айбо вєдно з тым «хромбукы» майсилно из усьых пострадали выд періода, кой торг перзоналных компютерӯв ся успокойив пӯсля скорого роста на зачаткови пандемії.
Дораз мож уповісти, ож Google переносит свӯй фокус на тоты ніші, де їх прӯйшлі девайсы якраз были неудачні: исе сфера розумных годинок (у котрӯй скоро ся появит Pixel Watch) тай таблетӯв на Android (у 2023 иппен мали бысьме увидїти такый).
Исе майскорї не тоталный кониць Pixelbook — тямите як Google казали ож перестанут робити таблеты обы ся сфокусовати на новтбукох?
Жерело: The Verge
