Гриб, котрый нам замінит пласты

Кидь исьте не доста любили грибы до сього, та найшли сьме вам щи єдну причину: прийде динь, кой из них будете годни учинити корпус на наушникы, талпу на топанкы, ци даже корпус на лїтавучого дрона. Недавні изглядованя указали, ож єден ипный филь гриба має читавый інженерный потенціал, обы замінити нам пласты у дуже многых сценарійох хоснованя.

Хоснованя грибӯв як матеріала поможе нам не лишати за собов груды смітя, котрым типирь знезахарюєме світ. Гикой знаєме, пластік, котрый чиниме из выкопных ресурсӯв, гикой нафта, тяжко, а пораз не реално, переробити. Найдеме пак наші флашкы изпӯд мінералної воды у зворї авадь на плажі моря. Айбо матеріал, учиненый из грибӯв, буде май легко ся перерабляти на нові продукты, бо розкладує ся самов природов тай многым май шіковно.

Гриб Fomes fomentarius є обєктом изглядованя, опубликованого у журналови Science Advances. У сього гриба є читавый потенціал, бо мож из нього чинити широкый спектер матеріалӯв: як мняткых гикой губка, так твердых ги дерево. Изглядователї кажут, ож выучувут структуру сього гриба, обы учинити из нього доступный матеріал на шелияку выробу.

Ясноє дїло, ож тото довгый процес, тай сись гриб не замінит нам дерево, пласт, тай бетон щи много рокӯв. Айбо мы видиме ож уже многі індустрії актівно глядавут алтернатівы, обы не быти так завистлыми выд нафты.

Исї грибы раз не можеме просто збирати у хащи — тото ниґда шуга не даст нам тӯлко ресурса, кӯлко нам треба, но зничит саму хащу. Мусят ся продумати тай реалізовати спеціалізовані фермы.

Так само сись гриб може быти ґенетічно вылїпшеный, обы го роздїлити на файты, котрі будут лїпше пудходити на даякі конкретні спеціалізовані сценарії хоснованя. Исе тоже чекат свойих изглядовачӯв.

Раз є читава надїя, ож кой продукт, учиненый из грибного матеріала, уломит ся, та не буде лежати у вас на полици (авадь у зворї) навхтема, а буде нормално переробленый у дашто инчоє. Кидь го вывержете, та вӯн має стати добривом на слїдуючі ґенерації сього такой матеріала, закрывавучи каріку выробы. Чекаєме, што буде дале.

Meet the mushroom that could one day replace plastic

Fungus could be the future of more sustainable design.

The VergeJustine Calma / @justcalma