Instagram дале лїзе у відео
Най банує родина Кардашіанӯв
Представник фірмы Instagram, Адам Мосері, опубликовав відео на свому твітерови, де ясно быв уповів, ож цїла платформа буде ся чим дале тым бӯлше сунути у бока пуддержкы відео-контента.
Адам розказав повно всячиного, мімоходом спомнив ай за нові тестові режімы, котрі сьте могли видїти уже типирька, кой відео с появлят у форматови цїлоекранового відео, из накладеными елементами інтерфейса на ньому (такой ги у ТікТокови).
Мушу вам казати правду, вижу вто сяк, ож чим дале, тым бӯлше на Instagram буде ипен вдіео-контента. – каже Адам Мосері
У будучности платформа буде ай дале пуддержовати образчикы, айбо уже стає видко, ож исе не буде основным фокусом платформы. Самі хосновачі чим дале тым бӯлше давут тай позиравут ипен відео-контент, тай платформа суне ся у того бока, куды ї сунут хосновачі.
Кроме того, Мосері спомнив ай за нову матарґу – рекомендації. В будучых обновліньох проґрамы увидите, ож у основному потокови публикацій будут появляти ся рекомендовані посты, не лиш выд хосновачӯв, якых вы напряму сїдуєте, но ай выд другых, котрі мавут подобный контент, котрі публикувут дашто, што вам бы ся мало полюбити, базовано на вашых пудписках.
Кидь видите рекомендованый пост, котрый ся вам направду не любит – исе значит, ож мы щи маєме пӯдлый алґорітм, та мусиме го злїпшити. – прокоментовав Адам
Хосновачі тоже будут мати можнӯсть "заглушити" рекомендації на даякый час (на динь, ци на місяць), авадь домак перейти у потӯк лем из тыми акаунтами, котрі слїдуєте.
Мосарі вірує, ож рекомендації станут єдным из майважных інструментӯв про создателюв контента, бо сяк они можут находити нову авдиторію напряму.
Знаву, исе звучит гикой читавый дараб змін нараз, айбо мусиме так учинити. Хочеме усокотити нашу платформу стӯчнов про вас, як про хосновачӯв. Айбо у тот самый час платформа мусит ся міняти, обы успівати за світом круг нас. – Адам Мосері
