Lenovo ThinkPad X1 Fold: великый, розкладный

З момента як у рокови 2020. фірма Lenovo презентовала ThinkPad X1 Fold прӯшло не мало часу, а вже дниська видиме новый покус техноґіґанта у ноутбукови из розкладным дісплейом. На сись раз направа буде мати нечекано великый дісплей – 16.3" напротив 13.3" у спередущого.

Нова верзія планшетного компютера из тым самым имням має доста инчакый дізайн. Замісто кожнагого облицьованя X1 буде мати покрыт из перербленого пластіка. Сим падом буде ай май тонкый, гикой спередущоє колїно.

Мало ся поміняла ай клавешниця – стала мало бӯлша, появило ся місто покласти ай упознаваный черленый «цуцлик» (маніпулатор TrackPoint), ай детектор удпиткӯв перстӯв. У режімови «новтбука» ся клавешниця заряжати не буде, бо капчат ся ид корпусови лиш маґнетовым крїпленьом. Заряжати ї мусите даяк окреме через USB Type-C порт. Тым самым такой маґнетовым крїпленьом можете капчати клавешницю ай кой направа є изкладена, обы вшытко носити наєдно.

Руно так, гикой конкуренты йим – Zenbook 17 Fold уд Asus, Lenovo хоснує «новтбуковый» процесор (ож x86, а не ARM). Ися ітерація X1 дӯстане процесор Intel 12. колїна, тото буде Core i5 авадь Core i7 у рамках спотребы електрикы до 13W, бо фунґовати мусит на пасівному остужованьови. Исе читавый крок упереда, кидь руняти спередущоє колїно направы на процесорови серії Lakefield, котрый хоть быв дуже енерґоефектівным, но нич трїбного не бировав.

Сись ґаджет мож буде купити зачинавучи из Новембра місяця за цїнов уд $2.499, но исе ціфра за саму направу без пудставкы тай клавешницї. Цїны за исї аксесуары раз не были ниґде озвучені фірмов Lenovo.

Жерело:

Lenovo’s New ThinkPad X1 Fold Goes Bigger

A 16.3-inch display and a new design without any gaps.

Tom's HardwareAndrew E. Freedman