Microsoft Office стає Microsoft 365
Офісный софтвер ниґде не йде, а лиш первый раз за 30 рокӯв міняє назывку.
![Microsoft Office стає Microsoft 365](/content/images/size/w1200/2022/10/DwFdrki.webp)
Пакет аплікацій, котрый скоро каждый из нас хосновав хоть раз у жывотї, дӯстали нову назывку — типирькы компанія из Редмонда буде їх кликати частьов не Microsoft Office, а Microsoft 365. Кроме того, office.com, мобілнӯв аплікації тай десктопнӯв верзії Office (котра тоже буде ся называти «365») щи й обновлят дізайн.
Microsoft 365 є выдправнов точков про: сервіс на відеоконференції Teams, текстовый процесор Word, табулкы Excel, редактор презентацій PowerPoint, поштовый клієнт Outlook, віртуалну дощку Loop, відеоредактор Clipchamp, відеострімінґовый сервіс Stream. У аплікації мож буде увидїти пантлю зо свойима запланованыма стрічами, релевантныма файлами тай документами, властныма мітками тай ґрупами про орґанізацію робочого процеса.
![](https://interfyisa.com/content/images/2022/10/g0IGdDE.webp)
Ид родинї Microsoft 365 щи ся припойит свіжо анонсована проґрама Microsoft Designer, котра позволит хосновачам чинити красні тай інформативні посты у соціалні сїткы, глядавучи (вадь ґенерувучи з помочов невросїток!) трафні образчикы пӯд контент.