Nokia, тай не лиш
Фінська фірма HMD Global ладит ся выпускати свӯй личный бренд смартфонӯв.
Ужек 6 годӯв HMD Global пущавут направы пуд брендом Nokia, а вже днись ладят ся указати світови ай свӯй бренд.
За сесе розказав Жан-Франсуа Баріл, єден из закладателюв, голова управлїня, тай ґенералный діректор фірмы HMD Global, на своюв сторӯнци у LinkedIn. Бизовав, ож смартфоны бренда Nokia не пропадут, а будут єствовати паралелно из HMD, тай ож фірма ся ладит робити из новыми партнерами.
Радый им вам розказати за нову ґарадічку розвоя нашої фірмы, за сотворіня бренда HMD. Уже дуже скоро можете чекати новоє портфоліо мобілных направ бренда MHD, руно так ги направ Nokia тай колаборації из новыми партнерами.»
– Уповів ґенералный діректор HMD Global.
У самӯв фірмі кажут, ож сут єднов из фірм, што розроставут ся тай злїпшувут ся майскоро на торгови, помежи усьыма выробниками 5G-смартфонӯв. Акцентувут увагу ай смартфонах Nokia, котрі хосновачі можут ріхтовати самі.
«Уєдно из жагов давати нашым куповачам кым май квалітні тай доступні мобілні направы, каждый из нас туй у HMD чекат на нашу праву будучнӯсть – сотворіня іноваційных продуктӯв, котрі будут бизӯвні, енерґоефектівні, котрі уменшат нетрїбноє електрічноє смітя, тай поможут простым людьом май довго хосновати свою направу и учинити хоть даякый позітівный влив на нашу планету.»
– написав Жан-Франсуа Баріл
Ґенералный діректор HMD Global раз не розказовав ниякі конкретні детайлы за нову серію мобілных направ бренда HMD, ани за нові девайсы Nokia, ани за тото, ож які тото будут нові партнеры у фірмы. Раз за сесе можеме лиш шпекуловати, айбо так си гадаєме, ож така інформація скоро ся появит.
Жерело: Mezha.Media
