Преміалноє гляданя у Google из ШІ
Фірма мирькує над платными пудписками на свӯй основный продукт, глядач Google, из преміалными можностями.
Платна пудписка може стати первов у історії прямов монетизаційов основного продукта Google — гляданя — через простых хосновачӯв. Новина за сесе аддека выплыла на Financial Times.
Сяк знаєме, ож Google розниковує додаваня даякых унікалных функцій до гляданя основаных на ШІ про хосновачӯв из преміалнов пудписков, де уже є доступ до помочника Gemini AI для Gmail тай документӯв. У публикації FT каже ся, ож інженеры Google уже роблят над поєдными функціями, но щи не є ясно, ож што из того всього буде запущено тай коли, бо не дорадили ся раз самі шефове.
Простоє гляданя у Google набизӯвно ся убстане безплатным, тай реклама зостане попри основні резултаты гляданя так само, не позиравучи ци маєте платну пудписку. Ися реклама принесла фірмі 175 міліардӯв америцькых доларӯв минулого року, што є бӯлш як половинов дохода з продавань у Google.
Гӯдтипирь Google зачали тестовати експеріменталный сервіс Search Generative Experience основаный на ШІ, котрый дає інформацію нашыроко, розписано, уєдно из удкликованями на жерела, додаточну інформацію, но и рекламу тоже. Сякі резултаты гляданя сут про саму фірму Google «май дорогі», бо ґенерація такої удповідї забират бӯлше серверных ресурсӯв, гикой стандартноє гляданя. Фірма понукала SGE лиш невеликӯв ґрупі хоснвачӯв, уєдно из даякыми пудписниками Google One.
Мож найти и варованя поєдных аналітикӯв, ож сякый приступ ид розшыреному ґенерованьови удповідї буде шкодливый про доходы Google выд рекламы, бо сяк хосновачі будут менше переходити на сайты, реклама котрых и приносит фірмі гроші. Другі сайты ся боят, ож можут утратити потӯк хосновачӯв, кидь Google буде через серсамы штучного інтелекта вытяговати з них інформацію тай розміщати у выдачі резултатӯв на сторӯнках глядача.
Пережываня за «вытягованя» інформації глядачом Google ціркулувут у інтернетови уже давно
Айбо сперед сим они были закапчані на тенденцію Google зчитовати інформацію из сайтӯв тай розміщовати ї такой у гляданьови у видї віджетӯв, без хоснованя ШІ у днишньому розуміньови сього терміна.
Доходило онь до того, ож у рокови 2019 популарна платформа из текстами на піснї Genius яла ся правити з Google, заявлявучи, ож техноґіґант брав уд неї інформацію про свої інфобоксы без позволеня тай атрибуції — факт «крадежа» інформації пудтвердили, закодовавши посланя у пісньовых текстах через два виды апострофӯв, котрі репрезентовали «цяткы» тай «рискы» азбукы Морзе. При тӯм у рокови 2022 было вынесеноє рішеня на хосен Google, бо Genius посправдї не годен мати права на тексты, а у юнови 2023 Вирьховный Суд США выдказав Genius у провбі поновити судовый процес.
Раз не знаєме набизӯвно як Google будут інтеґровати гляданя из ШІ у свої продукты. Аналітикы кажут, ож фірма годна запустити даякі функції из ШІ и про стандартноє безплатноє гляданя. В тот самый час у Google кажут, ож они не мавут у планах чинити гляданя без рекламы, ож бы и за платну пудписку, но платна пудписка дарує вам другі преміалні можностї тай выгоды.
Андрей Русанов
Коментарї () • Правила коментованя