Ребрендінґ заповідного фонда Пӯдкарпатя

Сись гостьовый матеріал загнав Адам Митер.
Хочете написати дашто на Інтерфийсу ай вы? Будеме лиш раді! Заганяйте ваші тексты на contact@interfyisa.com!

З чим ся у вас асоціює «сайт державної службы вадь обєкта у Закарпатськӯв области»? Скорше всього догадує ся штось неудобноє, шкарідотноє, вчиненоє «для галочкы». Исе не чудно, кой даже центральні інституції ги УжНУ не мавуть єднотный дизайн, хоснованя символікы, інформаційну політику. А межи тым, презентація служб на інтернетови грає нись читаву роль у животі люди, формує нашоє середовище тай спринятя. Тема широка, но туй ся мусиме зопрерти на єдному наглядному прикладови.

Природно-заповідный фонд ото єдна із майбӯлшых цінностюв, яку маєме у Пӯдкарпатьови. Вӯн туй представленый 4 основными обєктами: Карпатськый біосферный заповідник, Національный природный парк (дале НПП) «Зачарованый край», НПП «Синевир» тай Ужанськый НПП. До посліднього часу дані заповідні зоны были спрятані за завісов «комунальных» веб-сайтӯв. Нетрібноє посередництво інформації, неінтуітивный інтерфейс, любительська символіка, што ріже очи. Исе вшитко робило із нашых заповідникӯв доста непублічні тай непривітні обєкты. Для необознаного чилядника, што бы хотів про них штось узнати їх удвідати, ото проблема. Най вас Бӯг заварує, кідь исьте заграничный турист. Но у сьому звіданьови прийшла позитивна зміна.

У даный момент у бета-режимі реалізує ся проєкт інтеґрованого портала Природно-заповідного фонда Україны. Бисіда йде не лиш про ребрендинг тай діґіталізацію цілої сферы, а про окремі сайты для 80 обєктӯв, 4 из котрых — у Пӯдкарпатьови. Розробков и дизайном занимавуть ся українські фірмы SiteGist тай Happy. Бенефіціаром проєкта є Міністерство еколоґії. Но треба вповісти, ож ко платить «гостину»: фінансова пудпора йде уд німицького уряда, за што їм варта подяковати. Без їхнього матеріального імпульса у нашӯв бюрократичнӯв системі тяжко бы пройшла така централізована компетентна зміна.

Ушиткі сайты пудкарпатськых заповідных зон уже доступні на інтернеті. Першоє, што ся мече у очи, ото нова символіка тай уніфікованый дизайн (іконкы, фаребна гама, шрифт). У комбінації із інтуїтивнов структуров, исе впозирує парадно, так ги и має быти у 2023. році. На каждому сайті хоснує ся одна основна фарба — смараґдова зелена. У однӯв стилістиці вчинені лоґотипы: у Карпатського заповідника — медвідь, у «Зачарованого края» — будзьок; у Синевира — козуля; в Ужанського — саламандра.

Дале на каждому из чотырьох сайтӯв можете найти базову інформацію про заповідник, інтерактивну карту обєктӯв, даже які виды ростин тай тварин у ньому живуть. Ид прикладови, у Карпатському заповідникови є 35 высокогорных озер; у «Зачарованому крайови» живе хащова мачка; у Синевирьскому паркови 12 музеюв; а в Ужанському 11 мінеральных жерел. Исе вшитко доступно и из образчиками подано на сайтах. Дале є хосенна інформація про туристичні службы: де мож заночовати, якым транспортом ся мож добрати, які суть пішоходні маршруты и так дале. Про ушиткі контактні дані, учебні матеріалы, ідеї для вандрованя, інформацію для бізнеса, уже и не говориме. Тоже ї на сайті легко найдете. На центральному порталі до каждого заповідника і парка комплексна інформація є и по-анґлійськы.

Summa summarum, у ключову для Пӯдкарпатя сферу прийшла читава технічна тай брендова іновація. Сим лиш хочу ї зпропаґовати тай пӯддержати тренд. Інформаційна політика и популяризація у Пӯдкарпатьови ото велика проблема. Докӯть нам єдно што тай як упозирує, як ся презентує, та даже самі цінні наші ресурсы обстануться нереалізовані. Исе широкоє поле для роботы як уживачӯв вебовых сайтӯв, так для продуцентӯв.

🔗 Удкликованя на сайты:

• Централный сайт Природно-заповідного фонда Україны — wownature.in.ua
• Карпатськый біосферный заповідник — kbz.in.ua
• Національный природный парк «Зачарованый край» — zacharovanyikrai-park.in.ua
• Національный природный парк «Синевир» — synevyr-park.in.ua
• Ужанськый національный природный парк — uzhanskyi-park.in.ua