Русинськый словник тай не лем

Многым читачам ачий в новинку буде чути, ож домак такый словник маєме, но російсько-русинськый (и русинсько-російськый) словник были доступні онлайн из 11. апріля 2020. года, вдяку колаборації Юрка Капаца, ґазды сайта rueportal.eu, тай самого автора словникӯв, Іґоря Керчі, котрый поволив выхосновати базу податкӯв.

Сього року сись вебовый інструмент дӯстав шор дуже рядных злїпшень, ото и окрема секція из шелиякыми приказками, и читавоє обновліня ґрафічного дізайна, и щи дашто май інтересноє.

Лінґвістичні мапы

Ужек даякый час частинов rueportal.eu быв інструмент на онлайн-позираня лінґвістичных атласӯв, зобраных у нас у 20. сторочови професором Йосифом Дзендзелівськым, де сьте могли пороззирати, де кажут «біґлязь», а де «вошолӯв»; де кажут «булї», а де «крумплї». Моментално сайт обсягує 470 мап.

А типирька, уд тритього новембра 2024. исї два інструменты, словник тай база мап, дало ся успішно изкапчати. Аж будете глядати на словникови даякоє слово по-русинськы, та сайт вам автоматічно на тото слово даст и мапу, кидь така у сістемови є.

Сесе фунґує и наспак — на сторӯнцї мапы найдете долӯв и испис слӯв из ниї, котрі сут доступні у словникови, аж вам треба за них почитати май детайлно.

Попри сесе всьо мапа дає вам и лішту из селами. Біда в тӯм, ож на мапі села возначені лиш ціфрами, та пораз тяжко дослїпати котра ипен цятка зодповідат за тото вадь сесе село. Сперед сим мусай было окреме натїгати ся у испис сел тай глядати там своє. Уд днись доста вам такой пуд мапов дати чісло у шорик, обы вам нараз указало котроє село пуд тым числом є возначеноє.

Коментарь уд ґазды

Мали сьме шансу показковати из Юрком Капацом, основательом проєкта rueportal, тай домак актівного у кываньови чилядника.

Тямит ся, ож до дізкусії из автором словника жила щи ідея перенабрати го в онлайн вручну. Обзиравучи ся узада, ци віруєш ож побировав бы-сь?

Змагав бы-м ся. Кидь добрі тямлю, та 3–4 ийзрі слув ся уже устигло было перенести. Бізувно бы тото забрало о много май повно часу, не факт, ож было бы готовоє до днись. Айбо мав им там ладну адміністрацію, дякувучи котруй мож было заповньовати словник дакулком людьом на раз. Думаву, ож найшли бы ся помучникы, из котрыма бы ся тото дало учинити и ручно.

Minecraft по-русинськы — додано офіціалноє товмачіня

Перва у історії бавка де си можете уключити інтерфейс по-нашому!

ІнтерфийсаМигаль

Ци сут щи даякі сякі великі обновы у планах? Маймало такі, за котрі вже мож розказати.

Частьов тої великої убновы, котру-м адде дав вон, є и повно можностий, як из тов словниковов базов мож нарабляти дале. Появив ся «русинськый розшыреный» словник — єдна велика база, котра попиля слув из русинсько-руського словника І. Керчі убсягує и слова з другых жерел. Тото мож схосновати вшелияко, єдна можность є листати інтернет/літературу, тай глядати поєдні хыблячі русинські слова; друга можность є узяти даякый иншакый русинськый словник, тай заповняти го слово за словом, непозеравучи, ци тото слово уже є у Керчі (вадь инде у базі). Сяк ся типирь робить над діґіталізаційов старого русинсько-мадярського словника Л. Чопея (на днишньый динь діґіталізовано без мала 3 000 слув). Тото ушытко мож вшелияко філтровати, подля потреб хосновача. Што булше, словник ся став частьов єдної «екосістемы» портала «русинськый язык». Тот портал убсягує, окрем словника, и, напримір, базу нашых приказок, вадь лінґвістичні мапы за русинськый язык из вшелиякых лінґвістичных атласув. И кидь узяти тоты мапы, та д убрануй мапі тоже мож прикапчати слово з словникової базы. Пак сторунка слова буде убсяговати удкликованя на мапу, а мапа изясь на слово. Лем исе ушытко тоже велика ручна робота, на котру треба час, завто раз нич нового великого ся не планує, типирь бых ся хотів концентровати на адсякому капчаню єдного з другым.

Ци можеш ся похвалити даяков статістіков? Ци видиш, як повно люди хоснувут онлайн словник?

Словник має своє ядро фурташных хосновачув, котрі го хоснувуть динь-у-динь, айбо кидь брати суху ґуґловську статістику, та за місяць кулкость побзерань у словник досігать ~5–6 ийзрюв, а кулкость унікатных хосновачув ся гойдать у діапазонови 300–500 особ. Айбо лично мене май радує, ож словник дорус до высокых позіцій у гляданьови Google. Типирь, кой чилядник попровбує наґуґловати «русинськый (авадь русинський) словник», та наш словник буде безмала каждый раз у топ-5 резултатох, бо довгый час быв дись долув у дибрьох. Исе читаво помыгать шырити словник (а вєдно з ним и цілый портал тай адекватну русинську позіцію) межи новых людий.