Што ся стало на Reddit? Протест Reddit Blackout
31. мая 2023. рока у Reddit анонсовали зміны у політіцї за сторонні аплікації-клієнты, котрі увели платню за хоснованя Reddit API.
Пӯднятя цїны на API было зачатково нацїлено на компанії, котрі учат на податках Reddit свої проєкты у сферї штучных інтелектӯв, айбо пострадали ай розробникы сторонньых клієнтӯв ги Apollo for Reddit, rif is fun for Reddit, Boost, Narwhal, BaconReader тай другі, а щи обычні хосновачі, котрі заходили у форумну соціалну сїтку ипен через сякі аплікації. Проблема туйкы у тому, ож офіціална мобілна аплікація Reddit пӯдла у квалітї, не дуже адаптована пӯд хосновачӯв из особеными потребами, не є стӯчна на модерацію.
Крістіан Селіґ, розробник Apollo — єдного из майлїпшых, майпопуларных клієнтӯв про Reddit на iOS, котрый має нагороду Editor’s Choice у Apple App Store — написав, ож из персоналної комунікації из адмініштраційов сїткы вӯн ся дӯзнав, ож приступ ид API буде кощовати Apollo 20 тысяч америцькых доларӯв у рӯк. Селіґ написав, ож даже кидь бы вӯн лишив лиш хосновачӯв из платным абонементом на Apollo, вӯн бы ся обставав у мінусови. Позад того 30. юнія 2023 Apollo перестане робити.
Сообщество платформы дало свою выдповідь: скоро 9 000 «сабредітӯв», котрі мавут у сумі бӯлше ги 100 000 000 хосновачӯв, закрыли ся на даякый час, учинивши ся пріватными. Наслїдкы сьої акції видят даже тоты, тко ниґда активно не хосновав Reddit — «сабредіты» часто ся індексувут глядачами ги Google, позад чого могли сьте видїти у резултатах удкликованя на Reddit-діскусії у релевантных «сабредітах». Типирь, кой тоты сообщества стали, кидь перейдете за такым удкликованьом, увидите лиш уповістку, ож «тред є пріватный». Мож уповісти, ож протест Reddit у даякому сенсї поламав ай Google.
Хоть часть «сабредітӯв» уже вернула си публічный статус, исе домак не кониць Reddit Blackout: бӯлше ги 300 сообществ дотипирь пріватні тай не планувут тото міняти закидь менеджмент Reddit не передумає за цїны на API. Межи нима сут такі популарні «сабредіты» ги: r/aww (34.1 міліоны хосновачӯв), r/music (32.3 міліоны), r/videos (26.6 міліоны), r/futurology (18.7 міліоны).
Сітуація ся усугубила, кой CEO Reddit тай єден из його спӯвзакладатилюв Стів Гафмен (щи знамый за його Reddit-юзернеймом u/spez) заявив, ож сись протест не має дуже читавый фінанчный влив тай ож вӯн «прӯйде». Гафмен провюг Reddit AMA («Ask Me Anything»), вінованый змінам у API, айбо такоє інтервю лишило хосновачӯв домак незадоволеными.
Типирь, подакотрі «сабредіты» ги r/formula1 тай r/interestingasfuck придумали щи єден хытрый спосӯб протестовати: они переходят у катеґорію NSFW («Not Safe for Work»), котра є спеціално учинена про сообщества из контентом 18+. Дїло у тӯм, ож на публикаціях сообществ, означеных ги NSFW, Reddit не годен класти свою рекламу.
«Сабредітам», котрі не годни держати дале пріватный режім, понукавут уводити «дны солідарности» по вӯвторках тай ограничовати приступ авадь даяк иншак помагати протестови раз на тыждинь.
Варта уповісти, ож Reddit уже ся грозив заміняти на посадах модераторӯв, котрі прикапчувут свої «сабредіты» ид протестови.
У сітуацію уже ся вмішали ай гекеры из ґрупы BlackCat. Они украли у Reddit 80 ґіґабайтӯв податкӯв, жадавут 4.5 міліонӯв доларӯв тай зміну цїн на API тай грозят ся, ож кидь того не буде, они опубликувут файлы.
Компанія ай дале ся держит свої позіції тай не планує нияк ити на стрїчу протестувучым.
Авторськый текст Інтерфийсы.
