Telegram запустили абонемент Telegram Premium

Удключеня рекламы, подвоєні ліміты, май скороє тирьханя, файлы до 4 Ґб, спознаваня бисїды у голосовых уповісткох, ексклузивні реакції тай налїпкы — исе вшытко функції, котрі дає Telegram Premium.

Telegram запустили абонемент Telegram Premium

Накониць у Telegram появляє ся монетізація. Нив стала не лиш реклама у людных каналох, айбо и абонемент Telegram Premium, котрый дає унікалні можностї хосновачам. При тому Telegram твердо рїшили не заберати уже безплатный функціонал — абонемент лиш додає нові функції. Кроме того, обычні хосновачі будут годни хосновати подакотрі плусы Telegram Premium: приміром, они зможут тирьхати грубі файлы, завергнуті собисїдниками з абонементом, авадь докладати преміумні реакції, кидь ткось уже поклав таку на уповістку.

Накурто за то, што нам понукавут:

Файлы до 4 Ґб

Premium-хосновачі будут годни заганяти файлы розміром до 4 ґіґабайтӯв — при обычному лімітови у 2 ґіґабайта на файл.

Обы тирьхати такі файлы, не мусай куповати абонемент!

Май скороє тирьханя

Telegram Premium знимає ограниченя на скороту тирьханя — ушыткый контент у Telegram хосновачі з пӯдписков зможут тирьхати так скоро, як позволит йим йихня сїть.

Подвоєні ліміты

Из Telegram Premium годни сьте ся припойити до 1000 четӯв умісто 500; учинити 20 папок до 200 четӯв вмісто 10 на 100 четӯв; закапчати у главному списови 10 четӯв, а не 5; держати у облюбленых 10 налїпок, а не 5; быти властником 20 публичных четӯв, а не 10; мати у секції «За себе» до 140 знакӯв, а не до 70; зайти у 4 акаунты, а не 3.

Спознаваня бисїды про голосові уповісткы

Premium-хосновачі годни читати голосові уповісткы, кой не мавут можности авадь часу йих послухати.

Ексклузивні налїпкы

Premium-абонемент даст хосновати унікалні налїпкы з повноекранными анімаціями, котрі ушыткі увидят. Колекція Premium-налїпок буде ся обновляти каждый місяць командов убраных Telegram малярӯв.

Ексклузивні реакції

«Платні» хосновачі будут годни давати на уповісткы Premium-реакції ги 👌😍❤️‍🔥💯🤡🌭🐳.

Управлїня четами

Из Premium мож буде наштімовати, котра папка буде мовчанов — на ниї буде ся удкрывати аплікація. Щи абонемент даст можнӯсть уключити автоматичноє архівованя тай стишеня новых четӯв, обы тото не требало чинити «руками».

Май анімовані анімовані профіловкы

Туй не є хыбы: анімовані профіловкы Premium-хосновачӯв станут ищи май анімоваными тай будут грати не лиш на йих сторӯнкох, айбо и удну четӯв авадь у списох бисїд другых хосновачӯв!

Значок Premium

Хосновачі Telegram Premium дӯстанут значкы, котрі будут ся указовати усяде коло йих имени.

Удключеня рекламы

У подакотрых крайинох хосновачі видят нетарґетовану, мінімалістичну рекламу у великых публичных каналох — у испис функцій Premium входит удключеня сякої рекламы.

Абонемент стойит $3.99, кидь го куповати «напряму» тай $5.99, кидь через App Store.

700 Million Users and Telegram Premium
Telegram now has over 700 million monthly active users. Today we’re launching Telegram Premium – a subscription that lets you support Telegram’s continued development and gives access to exclusive additional features.