Токма за Twitter завершила ся

Цїна така, ги плановало ся на самому зачаткови: $54.20 за акцію. Компанія дӯстала статус «пріватної», лишила ся без рады діректорӯв тай зоперла публичный торг акціями.

Ілон Маск заню̄с у головный офіс Twitter умывалник — исе така словесна фіґля: тот факт, ож Ілон типирькы голова компанії, «треба переварити» (анґл. «let that sink in», што ся дослӯвно товмачит ги «пустити умывалник удну», вадь, кидь без фіґлю̄в, «дати тому осїсти»).

Майбогатый чилядник на Земли уже устиг провести шор «реформ» у насвіжо купленӯй компанії. Єднов из перемін, за котрі ся узяв Ілон Маск, стало кіряня топ-менеджерӯв: пӯд куртаня трафили ґенералный діректор Параґ Аґравал, фінансовый діректор Нед Сіґал, голова выддїленя правової політикы, довіры тай безпекы Віджая Ґадде, головный радник компанії Шон Еджет.

Кроме того, новый властник Twitter планує полївити політику модерації контента у соціалнӯй сїтцї — май конкретно Маск хоче поміняти пӯдход ид модерації «дезінформації» тай «языка ненависти», а щи ослабити цензуру на платформі. Исе важный момент, бо до презідентськых уберанок у США тай Бразілії ся обстає докус мало часу, а Twitter єдна из майвплывовых соціалных сїток у сих крайинох. Вартать спомнити, ож у маї 2022. рока, у процесї купованя Twitter, Ілон Маск заявляв, ож розблоковав бы акаунт екс-презідента США Доналда Трампа. Міліардер каже, ож не буде «принимати важні рїшеня вадь выдновльовати акаунты», поку не збере нову «модераційну раду» — при тӯм детайлӯв за вто, як тота рада буде фунґовати, ко у ниї трафит тай якый уплыв она буде мати, раз не дав.

Хосновачі указувут, ож на позадинї вісти за купованя сїткы Маском знаглї выросло число «антісемітськых тай расістськых твітӯв». При тӯм, правила Twitter за сякі трафункы формално щи ся не міняли.

«Twitter, очевидно, не годен стати сваволнов аренов, де мож безнаказанно уповісти хотьшто!» — твітнув Ілон Маск, а пак додав:
«Пташка выслободжена».

Удну компанії нового властника стрїтили доста неґативно, хоть личный візіт головы Tesla, SpaceX, The Boring Company, а типирь щий Twitter мав на даяку часть робӯтникӯв файну імпресію; айбо пӯсля того, як выгнали «вершок» компанії, многі ся изясь засомнївали у будучности Twitter. The Washington Post писали за «планы Маска покуртати персонал на 75%», айбо сам міліардер у часї стрїчи из робӯтниками компанії заявив, ож нич такого не планує чинити.

Кодова база Twitter дочасно заморожена — прӯйшлі властникы не годни вносити зміны у код ци імплементовати нові функції. 27. октовбра Маск, узявши з собов інженерӯв из Tesla у офіс Twitter у Сан Франциско, провю̄г ревю кода.

Авторськый текст Інтерфийсы.