Twitter має проблемы, хосновачі розникувут алтернатівы

З момента, як соціалну сїть купив знамый міліардер, стала ся серія радікалных змін удну фірмы, спозад якых ай уднушні робӯтникы, ай хосновачі зачали глядати си другоє місто.

Ілон Маск звітовав за тото, ож лишек за тыждень його управлїня сїть дала рекорд по кӯлкости актівных хосновачӯв, котрый пак перегнала 18 тай 22 листопада. Но подакотрі люди указувут, ож тото были просто «позирачі», што прийшли поникати, як ся «топит Тітанік».

Но люди, які перич приносили гроші сюй сїтї, а ипен рекламодавачі, зачали шіковно утїкати. Тай хосновачі май актівно ся зачали приниковати алтернатівам.

Hive

Ги кажут у TechCrunch, за каждым голосным потрясїньом у Twitter слїдує нова габа реґістрацій хосновачӯв у Hive (ред. пчоларій). У App Store у ЗША йихня аплікація уже досягла топ-20, за послїдньый місяць аплікацію установили бӯлше міліона раз.

Hive быв закладеный у рокови 2019 Кассандров Поп. Хоть исе не є прямый клон ци конкурент твітера, бо комбінує у собі концепты рӯзных соціалных сїтюв, популарных днись, но типирь ипен туды утїкат бӯлшина люди.

Кӯстяком тої аплікації не є потӯк новинок, гикой тото є у твітерови, ай скорше тематичні рокаші, де можете ся дӯзнавати за дашто конкретноє, гикой наука, техніка, музика, моторы, тай иншоє.

Post

У минулому ґенералный діректор Waze, Ноам Бардін, тоже робит над потенційным конкурентом сїтї Twitter. Сервіс Post пробує сотворити «людськоє місто на обговорьованя ідей, де люди можут уєдно ся збирати, учити ся єден у другого, слобӯдно приказовати тай веселити ся».

Гикой зазначавут у 9to5google, соцсїть акцентує на слїдувучых можностях, котрых ниє у Twitter:

• Можнӯсть куповати окремі статї у преміалных подавачӯв новинок;
• Можнӯсть читати уміст жерел у тому такой інтерфейсови, без потребы переходити на другі вебсайты (подобно до моменталного проникованя у Telegram);
• Пӯддержка творцюв контента через мікроплатежі;
• Можнӯсть писати довгі публикації без омеженя по кӯлкости сімболӯв;

Post – дуже нова сїть, що ся лиш актівно ріхтує типирь. Раз мавут лиш пару изрюв актівных хосновачӯв, но тота ціфра фурт росте из каждов бідов твітера.

Mastodon

Сїть Mastodon ся появила у рокови 2016, закладатильом быв нїмицькый проґрамішта Юджин Рочко. Сїть ся появила на світ якраз як алтернатіва Twitter, котрый на тот момент мав цїлый шор шелиякых змін, котрі ся Рочкови не любили.

Mastodon – сїть из удпертым кодом, децентралізована, без рекламы. Назывка удкликує на америцьку геві-метал банду Mastodon. Фактічно много в чому сїть напряму повторят функціонал твітера, айбо туй можете управити вже опубликованый текст.

Пӯсля того, як Ілон Маск купив Twitter, изирї хосновачӯв зачали утїкати у Mastodon. За податками BBC,  на типирь у сїтї сут 655 000 хосновачӯв, но лищ из них 230 000 прикапчали ся за минулый тыждинь.

Trumbeta

Кидь уже ся говорит за Mastodon, та мусай спомнити, ож тото аплікація из удпертым кодом, а значит хоть-котрый чилядник може на єї фудаментови вытворити свою сїть, придавучи туды трїбный функціонал. Спомежи многых другых такых «клонӯв» мастодона, спомниме туй ай за Трумбету, што ся позиціонує, гикой ипен руснацька сїть.

Моментално сервіс фунґує лишек за прямыми приглашками.

Жерело:

Три альтернативи Twitter, що набирають популярність на фоні проблем соцмережі

Новий власник Twitter, Ілон Маск ледве не щотижня звітує про нові рекорди приросту користувачів соцмережі. Перший рекорд було поставлено всього за тиждень його правління, 8 листопада. Нових рекордних показників, за словами Маска, соцмережа досягла в...

AIN.UAДанило Ївженко