У Telegram ся появлят «історії»
Павел Дуров, спӯвзакладатиль Telegram, анонсовав на свому каналови довгочеканый частьов хосновачӯв функціонал — «історії» ги у Snapchat тай Instagram.
Ги пише Дуров, на зачаткови команда Telegram была против такої ідеї — «історії» уже сут усяґде, йих люблят пхати даже туды, де они домак не парувут.
Айбо месенджер такы дӯстане сись формат тай учинит тото «у стільови Telegram»:
- мож буде ґрануларно уберати на кажду из вашых «історій», тко йих увидит: ушыткі, ваші контакты (из уйимками), лиш тоты, тко сут у вашому исписови близькых цімборӯв и так дале;
- «історії» ся будут указовати горї списа вашых четӯв, айбо будут мовчано спрятані «пӯд шіпку» тай чекати, закидь потягнете долӯв, обы йих увидїти — обы не занимати много міста;
- аж не захочете видїти «історії» конкретного чилядника, будете годни го спрятати, товды його «історії» ся будут указовати у спеціалнӯв секції у Контактах, а не на головному екранови;
- буде ґрафічный редактор из можнӯстьов давати на «історії» пописы, лишати удкликованя тай споминати другых люди;
- дадут можнӯсть ай чинити «історії», похожі на публикації у BeReal, из образчиками нараз из задньої тай передньої камер;
- мож буде уберати час, за котрый «історія» пропаде: через 6, 12, 24, 48 годин, авадь лишити ї на вашому профілови навхтема.
Дуров пише, ож Telegram-каналам буде выгода выд нової функції: они поберувут май легко наберати популарнӯсть, кой команда месенджера запустит можнӯсть репостити уповісткы из каналӯв у свої «історії».
Ужек было проведеноє уднушньоє тестованя, бігом котрого «даже скептікам у командї [Telegram] зачала ся любити йся функція». Типирькы «історії» проходят послїдню стадію тестованя тай повноцїнно ся появлят у юлійови.
