Oct 6, 2025 Назоры

Што ся стало из Nokia?

Марафон уд майпопуларного телефона у світі до забытя.

Колись май давно уже сьме писали, наприклад, подобну історію за Philips, тай дустали сьме читавый позітівный удклик у читачув. А значит є смысел розказати и за другых технолоґічных ґіґантув, подакотрі будете спознавати, подакотрі вже не дуже…

Зачаток

Аж утікати гет гет на зачаток, та Nokia тягне коріня из рока 1865, хоть добрі розумієме, ож смартфоны у тот час ся не вырабляли. У Тампере, Фінландія, інженер Фредрік Ідестам (Fredrik Idestam) заклав просту фабрику на выробу папіря, ани не думавучи, ож його творіня буде мати читавый влив на історію технолоґій у світі.

Направду туй мож розказовати довго, но в рамках сього тексту вылишиме гет цілоє 19. тай зачаток 20. стороча. Бігом сього часу Nokia вырабляли лиш папірь (и другі продукты из папіря), ґумові выробы, тай друт. Май інтересным нам буде період мало май дале.

Бігом середины 20. стороча мы видиме як Nokia, в колаборації з многыми великыми технолоґічными ґіґантами того часу, робит читавый вклад в розвиток многых галузок наукы и технікы, помагат привнести у сесь світ и зробити май доступными транзисторы, телефоны (щи дротові), телевізію, лазеры, и даже такі нетривіалні річи гикой Unix OS тай язык проґрамованя C (а ипен Nokia Bell Labs). Переличити контрибуцію Nokia у наш світ займе много часу, айбо можете почитати самі у них на сайтови.

Ужек у 70. тай 80. рокы 20. стороча компанія мала читаву репутацію тай влив на телекомунікаційну сферу у світі. И у 90. рокох ипен на Nokia держала ся ростуча сфера мобілного зязку, бо ипен на «желізови» фірмы Nokia запустили стандарт GSM (Global System for Mobile Communications) тай у первый раз зазвонили на «мобілник» первого юлія 1991. рока.

Майпопуларный телефон у світі

Уд середины 90. до середины 2000. рокув Nokia были домінантным лідером у світі мобілных телефонув. Айбо бизувно не спозад монополії на патенты, своє місто на верьхови заслужыли си: у пріорітет ся фурт клала кваліта выробы и довговічность технікы. Ваша старшина ся може нагадат, ож не на фіґлю Нокійов 3310 мож было товчи оріхы.

Помежи усіма «леґендами» можеме спомнити за даякі конкретні моделі, котрі лишили свуй слід в історії.

Телефон Nokia 8110, анонсованый у рокови 1996, дустав быв прозывку «банан» спозад выгнутої формы корпуса. Тко го не застав у хоснованьови, точно го видів у кінови Матриця (1999), ипен из нього звонив головный герой — Нео.

У рокови 1998 майпопуларным смартфоном быв Nokia 5110, у котрому кроме знимных кольоровых панелюв світ увидів и бавку «Гыдик» (Snake), котра у многых варіаціях жыє до днесь.

Еру 90. рокув закрыєме щи єднов леґендов — Nokia 3210, выпущенов такой нараз у 1999. рокови. Майважным аспектом сього телефона была спрятана удну антена, што было доста «прорывом» того часу. Но тай, як сьте ся могли догадати из формы тай номера серії — сесе была база діла майлеґендарного телефона на білум світі…

У 2000. рокови Nokia упущат модел 3310 — телефон, котрый ся затямив як майбизувный, муцный, выдержливый. Возможность пробыти на єдному зарядови батеркы цілый тыждень ото не фіґля. Не кажучи вже, ож сесь телефон легко жыв аж трафляв пуд мотора вадь падав из бог знає якого штока. Цілком у світови ся продало 126 міліонув сих телефону, што, на великоє чудо, є аж у два раз менше выд майпродаваного телефона у світови — а ото зась Nokia, лиш 1100, што досягла 250 міліонув проданых телефонув за цілый час.

З верьха — долув

Середина 2000. рокув стала переломным моментом, кой фірма Nokia направду яла страчовати свої лідерські позиції, бо мало схыбили пріорітеты. Што конкретно ся стало?

Зачала ся ера смартфону — у рокови 2007 быв представленый Apple iPhone, и такой по ньому яли ся появляти доста прорывні направы на Android. Закедь другі компанії зачали інвестовати у смартфоны, управлінці у Nokia были натвердо увірені, ож смартфоны из сенсорным екраном ото дурниця, котра ниґда не стане популарнов. Nokia фокусовали свою увагу и інвестиції на телефонах серії N, котрі ся могли похвалити читавым технолоґічным напарованьом: парадні процесоры, серсамы на роботу в інтернетови, Bluetooth — сугубо по «желізови» они были на высоті, но фунґовали на Symbian OS, котра у кунци 2000. рокох вже зачала стаґновати.

Из помежи посправдішньых флаґманув Nokia можеме спомнити N73, котрый быв послідньов серйознов провбов фінської компанії конкуровати из другыми брендами. Ипен Symbian OS якраз позиціоновала ся, як «дораз смартфон», хоть точну дефініцію того терміна тяжко выліпити. Тоты телефоны бировали ушытко, што бы сьте чекали уд модерного смартфона: доступ до електроної пошты, GPS, інтернет бравзер, роботу з презентаціями тай документами шелиякых типу, играти MP3 музику, и майголовноє — іншталовати нові аплікації. Тай най уже нич не кажу за препарадну фото- тай відеокамеру, из лінзами уд Carl Zeiss.

Аж сяк подумати, N73 муг ся похвалити усьым тым, што было и у першых моделув iPhone, тай в многому на май серйозному уровни. Операційна система была мало май «доросла», быв очевидный фокус на бізнес, роботу, ефектівну комунікацію.

Та чого тогды Nokia, мавучи такого «монстра індустрії», пруграли гонку смартфонув? Аж накурто, та можеме звести тот роковый путь удолину до дакулькох моменту:

Дуже помала адаптація спозад конзерватівного управліня. Удну компанії вже немолода керовна рада не могла шіковно адаптовати ся ид новым условіям торга, хоть-які іновації зачали пробігати дуже довго и стаґновати спозад бюрократичного шпотаня.
Фокус на бізнес-направы. Конець 2000. рокув став переломным моментом, бо в першый раз в історії основными куповачами предорогых смартфонув стали не бізнесмены тай урядовці, ай мало май проста челядь, котра мала вже доста инчакі нарокы до свої технікы.
Стаґнація операційної сістемы. У Nokia бояли ся брати ся за Android, фірма віровала, ож такым путьом они утратят контролу над тым, як хосновачі будут оперовати из телефоном, и фокусовали ся на свойих ОС — Symbian и май пак MeeGo. Но, як видиме, не побировали йих модернізовати.
Іґнорованя тренду дотыкового екрану. Сесе ачий майсерйозна хыба, котру пак в Nokia признали, айбо момент уже быв утраченый. Як ся указало, бульшина челяди хоче знимковати фотькы, позирати відеа, читати книгы, а не писати «емейлы». Хоть перві поколіня резистивных дотыковых екранув мали доста слабу точнусть в каждоденному хоснованю, но з появов доступної технолоґії конденсаторных сенсору, котрі днеська сут у каждум смартфоні, они завойовали довіру хосновачув. А Nokia тот момент профітькали.
Фокус на фізичну клавешницю. Руно так як и Blackberry, у Nokia віровали, ож йих основна база куповачув, буде потребовати фізичну клавешницю. Но, як ся указало, позирати відеа в ютубови мало легше, кой половину телефона не забират клавешниця, котру не хоснуєш так часто, а спрятати не мож. Сценарії хоснованя смартфону посунули ся у бока мултімедії, што посиловало мати май велику образовку.

За послідньый пунктик писали сьме на Інтерфийсі мало май давно:

«Гвузд у деревище»

У кунци 2000. у Nokia стали розуміти, ож они утрачавут позиції, тай у пилованьови допустили щи єдну фаталну хыбу: партнерство из Microsoft, обы хосновати Windows Mobile як основну ОС из рока 2011. Хоть сама выд себе Windows Mobile не была така тяжка и пудла, и по свойим возможностям у многому могла конкуровати из Android, но сякоє крітічноє рішеня не прияли потенційні куповачі. Фанаты Symbian OS дуже розкрітіковали такый крок, не розумівучи чого Nokia не продовжує розвиток свої личної операційкы, котра вже была добрі выдполірована и могла ся розвивати дале. В тот час, як нові потенційні хосновачі не виділи нич інтересного у Windows Mobile и тягли ся у бока ид Android авадь iOS, партнерство из Microsoft зачало узирати як токма из дияволом.

Олем поруняйме дінаміку тых рокув у числах. У рокови 2007 Nokia продали 437 міліонув телефонув, в тому числі 60% усьых смартфону у світі. У рокови 2010 Nokia продали 453 міліоны телефонув, но не позиравучи на номінално высшоє число, Nokia вже залеґдвы урвала 35% торга смартфонув, бо читаво уросли Android тай iPhone. Значит лишек за три рокы, не позиравучи на общу стабілность продажу в сухых цифрах, фірма утратила домінацію у сеґментови, котрый, як указала історія, быв майважным на тот момент. А з момента повного перехода на Windows доля смартфонув у Nokia покуртала ся до 17% торга у 2011. рокови, а пак у 2013. упала гет до менш як 3% торга.

У рокови 2014 мобілный сеґмент Nokia повностю купили Microsoft за 7 міліардув америцькых доларув. На сьому можеме класти хрест на телефонах Nokia, бо ушытко, што ся діяло дале, было повностю пуд контролов Microsoft, и вже, мож так казати, было гет другым никаньом на телефоны.

Днешні реалії

Айно, у рокови 2014 поклали сьме хрест на мобілных телефонах Nokia, айбо не на фірмі цілком. Обы сьте розуміли ситуацію, Microsoft купили лишек провалноє удділеня мобілных телефонув, закедь Nokia мала и другі удділеня (напарованя на мобілні сіті, карты Nokia Maps, патенты и другі изглядованя), котрі ся чули многым ліпше. У рокови 2012 Nokia заробили пиля 30 міліардув еврув, из чого сеґмент мобілных телефонув творив не булш як третю частину.

Фірма Nokia продовжила фунґовати надале и сміло ся чули у сеґментах, де твердо стояли на ногах; удверли уд ся лиш тото, в чому явно пруграли гонку из конкурентами. Булше того, Nokia сфокусовали ся на мобілных сітях и даже купили Alcatel-Lucent у 2015 за немалу цифру — 15.6 міліардув еврув, указувучи, ож фінськый техноґіґант щи має и гроші, и амбіції.

Но сесе не конець історії из телефонами: закедь класічні 3310 авадь N73 заняли своє місто далеко в історії, у рокови 2018 фірма Nokia дорадила ся вернути ся у світ мобілных направ из новыми ідеями, и може мало меншыми амбіціями, уєдно из брендом HMD Global. Ци дасть ся Nokia вернути ся на такі высоты на торгови смартфонув, де были колись флаґманы на Symbian? Час укаже, но што можеме точно уповісти — Nokia жиє дале, хоть и не є ї так слідно як колись.