Наш назор на нестандартну платформу про обмін «жывыми» фотоґрафіями.
Французська соціална сїтка BeReal провела у тїни дас два рокы — аплікацію выпустили онь у 2020, айбо популарнӯсть платформі принюс уже 2022. рӯк.
Прінцип BeReal дуже простый: раз на динь ушыткым хосновачам приходит голошіня (BeReal дає наштімовати реґіон, обы не заганяти вам тоты голошіня уночи). Пӯсля того стартує таймер на 2 минуты (нестрогый: годни сьте опубликовати свою фотьку и май потӯм, кидь ся не укладуєте у тоты 2 минуты), обы каждый хосновач опубликовав по фотоґрафії. Айбо є нюанс: у BeReal не мож тирьхати фотькы из ґалереї — їх мож лиш чинити прямо у аплікації, у момент публикованя. Причому фотькає она на обыдві камеры нараз — обы цімборове вам увидїли не лиш то, чим исьте заняті, айбо ай вас самых.
Хосновач не годен видїти чужі публикації, докидь не даст свою, а на фотькы другых хосновачӯв не выйде бездумно влїпити «лайк» — у BeReal мусите сфотькати себе, обы указати комусь реакцію на їх образчик (исе ся удну кличе RealMoji).
Ушыткі йсї нюансы чинят BeReal направду «жывов» сїтков, а не концентратом вылизаных выдредаґованых фотоґрафій. Туй не є ниякых фотофілтрӯв, лїчилникӯв лайкӯв авадь способӯв експлуатовати людськый FOMO («fear of missing out») — страх дашто пропустити.
Мовчано BeReal указує ваші фотькы лиш тым, кого сьте додали цімбором удну аплікації. Цімборӯв мож находити як за йих удкликованьом (формата bere.al/username), так и межи свойима контактами.
Ид публикаціям мож капчати свою ґеолокацію — исе ся уберат окреме про кажду фотьку. Сут три варіанты: «не шырити локацію», «дати приближну локацію» (область, крайина), «дати точну локацію» (назывка улици, город, крайина).
При тому туй є ай вкладка Discovery, котра служит ґлобалным пантликом — обы зачати публиковати свої «бірілы» на цїлый світ треба лиш уключити удповідноє штімованя.
У аплікації є щи лична сторӯнка «Споминкы» — нико кроме вас ї не увидит. Туйкы найдете архів свойих постӯв, розкладеный на календарьови. Функцію мож выключити у штімованьох, айбо у такому припадї навхтема стратите ушыткі свої ужек архівовані публикації, а нові будут ся автоматично удаляти онь докидь изясь не включите «Споминкы».
Хочете ся подїлити даякым старым «бірілом» за гатарами сїткы? Мож супокӯйно стирьхати си на девайс любу «споминку» авадь такой из BeReal дати ї на Instagram ци Twitter.
Што ся кыват push-голошінь, мож уберати, за котрі дїйства маєте дяку йих дӯставати: кой вас кось цырмат через @, дає коментарь авадь RealMoji пӯд вашу публикацію, хоче вас додати у цімборы ци публикує «пӯздньый» BeReal.
Щи єднов важнов можностьов є штімованя часового пояса из чотырьох варіантӯв: Америкы, Европа, Западна Азія тай Восточна Азія. Проґрама позерат на ваш выбор, обы вас дюґали фотькати ся лиш удинь.
Не обыйшло ся ай без мінусӯв: пораз аплікацію треба пару раз перезапустити, обы она порозуміла, ож вы уже опубликовали свӯй «біріл» тай дала вам поникати фотькы цімборӯв авадь пантлик Discovery. Пораз аплікація знає домак уповісти, ож цімборове вам ищи нич не опубликовали, айбо ги пережый баґ, сись тоже ся «лїчит» перезапуском. Критичных баґӯв BeReal моментално не має.
Айбо баґы ліквідовувут ся (щи місяць типирь испис технічных претензій ид Android-аплікації быв мало май довгый!), кваліта аплікації вылїпшує ся, а розробникы не выдходят выд зачаткової ідеї.
Де мож си стирьхати BeReal:
