Ци могли бысьме закавільовати з инопланетянами?

Усьо жывоє на Земли має єдно походжіня. Орґанізмы хоснувут ДНК як носитель наслідственої інформації, синтезувут білкы, а булша часть біохемічных реакцій ся роблят у водному просторі. Вдяку сьому люди — и не лем люди — домак годні жыти.

Айбо позаземный жывот (кобы такый быв) не факт, ож ишов бы такым ипен путьом, як пушли мы. На сесю тему є написано дуже много, и далеко не єден автор научної фантастикы пробовав собі нашпекуловати иншакый тип єствованя. Но, тай не лем фантасты сякым ся занимают…

Чоловік обычно видит їдіня ги набор продуктув, из якых маєме білкы, жиры, угльоводы. Вдяку сьому жыві орґанізмы на нашуй планеті можут держати здоровый розвуй, функціонованя, пуддержовати роботу нервової системы авадь єї аналоґа. Можеме собі подумати, ож незалежно уд того, де ся появлят новоє жытя, оно мало бы мати якыйсь механізм дуставаня енерґії и єї жерело.

Даже помежи земных орґанізмув є велика розлука. Але: коалы можут жвати листя евкаліпта, отровноє про многу другу звірьку, а пергач-вампір не їст нич до лиш мнясо. За сим можеме зробити высновок, ож раціон ся вузначає еволуційов. Кедь бы ся жывот на другых планетах явив незалежно уд земного, та його ґенетичный матеріал муг бы мати иншаку уд людської будову; ачей людськоє їдіня їм бы товды мало чим помогло, а такой гостити їх кавільом такой годно бы было ся указати опаснов про їхньоє здоровля затійов.

При тому наука не каже натвердо, ож позаземного жытя не є. Біохемікы з Америкы зглядовувут возможность єствованя другых видув ґенетичных молекул, які бы могли брати на ся функцію ДНК, гадавучи, ож природа може быти май рузномайита, чим мы думаєме — завто бігом гляданя жытя на екзопланетах варта уникати сугубо „земльоцентричного“ пудхода, бо кедь будеме глядати копії земної біосферы, та можеме пропустити май чудну форму жывота.

Представме си на минуту, ож стрітили сьме позаземну форму жывота, котра має, плус-мінус, похожу до нашої біолоґію: хоснуют воду як основу, валовшні дуставати енерґію из сполук карбона, валовшні розкладовати сложні протеїны. Даже кобы так, кобы они теоретично могли засвойовати земні орґанічні речовины, и нам бы ся дуже хотіло їх погостити (а они бы, най буде, не были против), мали бысьме иншаку проблему: а ци дожыли бы вни до самого процеса кавільованя? На нашуй планеті жывут мікроорґанізмы, бактерії и вірусы, до якых ипен людськый орґанізм давно є приспособленый, айбо позаземнуй формі жывота наша екосистема могла бы нашкодити. Тото фунґує и у другу сторону — а кедь бы инопланетні гості нам привезли свої инопланетні бацилы, до котрых наша екосистема щи не готова?

Щи єдна дилема: учені кажут, ож першыми гостями з космоса скорше всього будут не біолоґічні формы, ай автономні машины вадь системы штучного інтелекту. Тото в принципі лоґічно: роботам ни дыхати, ни їсти не треба; и позад того, ож роботичні инопланетяне бы были многым май довговічні гикой „жыві“ путьовачі, они бы ліпше выдержовали и космічну радіацію, и многоручні перельоты, а значит їхні шансы долетіти до нас многым май высокі. Біда в тому, ож из такыми навряд закавілюєме — машинам ачей бы треба было иншакі жерела енерґії авадь штось май матеріалноє и праґматичноє — даяка ядерна енерґетика, неудкрыті для них хемічні компоненты, електрика и так дале.

У такому трафунку Земля бы стала плацдармом новых технолоґій, и у лінґвістув, перекладачув бы ся появило булше роботы з встановленям контакта из позаземными гостями… а баристы бы мусіли дале нарабляти з земными клієнтами.

Сяк можеме уповісти, ож днешня наука не може нам розказати, чим бысьме погостили инопланетян на Земли. Майскорі, годні сьме си припустити, привычноє для нас їдіня они бы не змогли оцінити позад потенційно неєднакых біохемічных процесув — понятя їды для них могло бы значити штось такоє, што наш розум ищи не може си представити.

Завто не пилуйме гріти бловдеры тай искладовати меню для гостюв из другых планет — не знаєме, ци вни на такоє будут мати дяку. Ліпше ся сконцентруйме на тому, што бы ся тых инопланетянув позвідати? Вопросув будеме мати міх, тай щи жменю.

Вдухновліня

If aliens landed on Earth tomorrow, what would they eat?

Biology allows us to speculatively map out an alien’s energy needs.

The ConversationJosé Miguel Soriano del Castillo