Jan 23, 2023 Новостї

Два рокы Інтерфийсї

Хвалиме ся: дниськы два рокы выд закладеня проєкта «Інтерфийса»!

Хочеме подяковати такой каждому, тко нас читат, діскутує у коментарьох, слїдит за нами у соціалных сїткох, дїлит ся нашыми матеріалами из свойима цімборами тай любым другым способом помагат нашому дїлу!

Сись рӯк може и не быв такый продуктивный ги першый, айбо устигли сьме направду много. Майважными моментами у жывотови Інтерфийсы за сись період мож назвати появленя вебсайта, на котрому ся типирькы публикувут ушыткі нові статї (тай на котрый перенесли сьме ушытко из катеґорій «Популарна наука» тай «Назоры»), сторӯнок у Twitter, Instagram, Facebook.

Рӯк быв тяжкый... Його зачаток (а май точно 24. фебруара) став ай зачатком повномасштабної російської інвазії в Украйинї — звірьського тай абсолутно негуманного у каждӯм детайлови акта над крайинов, у котрӯв жиє тай творит команда Інтерфийсы. Айбо на щастя, мы його успішно пережыли тай хочеме подяковати ушыткым, тко ся прикапчав ид оборонї Украйины — ото йихня заслуга, ож мы цїлі тай здорові.

Вебсайт interfyisa.com за 6 місяцюв — усього-навсього пӯв рока! — нараховав 871 унікалного читателя; Telegram-канал Інтерфийсы вырӯс из 108 пӯдписникӯв до 177; наш Twitter скочив из 53 фоловерӯв до 116; сторӯнка у Instagram моментално має 30, а сторӯнка у Facebook — 7 пӯдписникӯв.