Google кажут, ож Bard ото не серсама на гляданя

«Bard є лиш доповніньом до гляданя» – сяк кажут у Google за йих новый чат-бот, котрый щи є у стадії бета-тестованя. Позором фірмы сись новый ШІ не має быти серсамов на гляданя, а скорше ґенератором ідей, мейлӯв, поем, тай щи шелиякої біды, но не глядачом.

Айбо є єдна рїч из сим «Бардом», тай не лем из ним, ай из каждов другов серсамов — фірма не може діктовати хосновачам, ож што они з ним будут чинити. За послїднї пӯвгода, кидь поникати на сценары хоснованя ChatGPT, та видко, ож люди якраз нарочно пробувут высхосновати ШІ як інструмент на гляданя. Тай прямі конкуренты фірмы Google тоже так позиціонувут свої продукты: голова Microsoft, Сатъя Наделла, якраз казав, ож они запускавут чат-бот у Bing обы «пуддюґнути ґуґловцюв», каже: «хочу обы люди знали, же мы заставили Ґуґел запереживати».

Позором хосновача Bard є простым текстовым польом, куды треба вписати текст. А мы добрі тямиме, ож дораз дві декады Google вже мали такоє текстовоє поле, куды люди вписовали што хочут глядати. Помежи тым самі такой Google послїднї пару годӯв нахвальовали свого віртуалного асістента, кажучи ож асістент може многым май лїпше удповідати на звіданя гикой простый глядач Ґуґла.

Выходит так, ож Bard — глядач, выпущеный фірмов, котра стала знамов спозад гляданя, незалежно выд того, ци самі Google тото хотїли. Любит ся тото фірмі ци нє, а они типирька запускавут новый сістем на гляданя інформації.

У самӯв фірмі доста скромно, тай релатівно розумно, розказувут за Bard тай што вӯн може чинити. Головно завто, ож Google твердо розумівут што вӯн може, а што не може чинити. Фірма каже, ож Bard є ипным ґенератором ідей, може помочи вам написати поему, авадь наґенеровати новых напрямӯв уже еґзістувучої ідеї, айбо пораз може неточно удповідати на дашто очевидноє... што бы сьте могли наґуґловати.

Google уже провбайлувут урїзати сьому чат-ботови ож што вӯн може, а што не може чинити, обы мінімізовати трафункы, коли Bard буде выдавати нерелевантні резултаты. Bard не удповість вам на звіданя, ож як учинити ґазову бомбу, кобы сьте ся нагоду пробовали звідати. Google уже довго тестувут свӯй продукт, тай не лем Bard, у нього были «вӯтцї». Айбо приклад глядача Bing указує нам, ож мы ниґда не знаєме, што направду будут из ним чинити реалні хосновачі.

Айбо реаліта така, ож інтерфейс сістема Bard вызират руно гикой інштрумент на гляданя. А глядач из нього доста паскудный. Руно так само, гикой ChatGPT тай новый Bing, кидь казати правду. Ушыткых трьох имали за руку, кой казали пряму неправду, ци даже домак чудні придумкы на уровньови фантазій, пудмітувучи хосновачови «факты» тай детайлы котрых просто не є. Bard не указує вам выдкі узяв інформацію, не дає цітаты тай жерела, а значит повно інформації ай дале треба вручну перевіряти, треба ї, перебачте за слово, «ґуґловати»...

Ситуація вызират щи май компліковано, кой ся звідати за дашто, у чому не може быти обєктівної позиції. Яка высота плота буде «май лїпша»? Bard даст вам даяку конкретну ціфру, без ани єдного валідного арґумента ож чом.

Google, направду, варувут вас, ож Bard є лишек експеріменталным продуктом, на котрый ся не мож повностю сполїгати у серйозных задачах. Сам продукт повный поп-апӯв тай нотифікацій за тото, де ся каже ож удповідї Барда годни быти неточными, а подаколи просто неправилными. Фірма Google многым май осторожно презентує свӯй продукт, кидь руняти из тым як из тым было у Bing. Тай мавут на тото серйозні причины. Головно завто, ож фірма Google стала серйознов компанійов, бо мали продукт, котрый давав конкретну інформацію на конкретні звіданкы. Кидь продукт сиї фірмы перестане давати точну інформацію, та ушыток йих бізнес буде мати проблемы.

Раз Google хочут обы хосновачі видїли Bard гикой бавлїнку, лишек шанс кукнути у далеку будучнӯсть, де ШІ направду буде мочи чинити дашто на хосен. Правда є проблема: кидь оно вызират гикой глядач, удповідат вам гикой глядач, тай має «google.com» у свому адресови... Та люди го будут хосновати гикой глядач. Тай ставом на днись продукт ид тому явно не готовый.

Google says its Bard chatbot isn’t a search engine — so what is it?

Chatbots like Bard, Bing, and ChatGPT have a long way to go before they replace the 10 blue links.

The VergeDavid Pierce