Прӯйшло май бӯлш ги місяць часу з того момента як Telegram запустили свӯй абонемент Telegram Premium.
Сяк ся 22. юнія зачав малинькый експерімент, бігом котрого сьме купили місяць преміум-абонемента у месенджерови. Дїлиме ся з вами нашым назором — ци буде из «преміума» у його днишнюм видї даякый хосен про просїкового хосновача Telegram, ци вартало куповати абонемент такой на запускови тай што ся нам трафляло май часто — четы, у котрі годни зайти лиш преміум-хосновачі ци четы, у котрых участникӯв из «преміумом» автоматично банят?
Зачнеме из того, ож в Украйинї Telegram Premium кощує $4 за місяць кидь куповати напряму у Telegram через бота @PremiumBot тай $6 за місяць кидь куповати через Google Play авадь App Store.
Процес купли через бота доста легкый тай безпроблемный: мож не выходячи з месенджера оформити абонемент тай заплатити за нього, а пак иппен у тому ботови єдным кліком зоперти (функції Premium при тӯм ся обстанут активными до кӯнця заплаченого сперед тым періода).
А типирькы за сам Telegram Premium. Нараз вартат уповісти, ож днишня позіція адмініштрації месенджера є така, ож ушыткый функціонал, на котрый хосновачі уже «розраховувут» тай котрый быв приступный безплатно сперед уведеньом преміум-абонемента, мусит ся обставати безплатным. Завто «преміум» не чинит платныма старі функції, а додає нові — айбо тых функцій, котрі мавут даякый практичный хосен, мож пораховати на перстох єдної рукы; на днишньый динь, Telegram Premium май похожый на пожертвованя из бонусами, ги на спосӯб стабілно ся монетізовати.
За то, што входит у абонемент, писали сьме май давно:
Петро
Майхосенными платными можностями мож назвати спознаваня бисїды (speech recognition) про голосові уповісткы тай май высокі ліміты. Спознаваня бисїды робит доста ипно, што не є чудно, бо удну тота функція хоснує Google Speech-to-Text API, а пӯднятя ограничень годно читаво спростити жывот адмініштраторӯв каналӯв, про котрых 1024 знакӯв у описови образчикӯв а відий тай 10 публичных каналӯв/рокашӯв ото надміру тїсні рамкы.
Даже кидь исьте межи тыма людьми, про котрых главнов цїнностьов Telegram Premium сут додаточні реакції на уповісткы, налїпкы из анімаційов на ушыткый екран тай другі косметичні бонусы… абонемент вас майскорї не задоволит. Біжный выбор преміум-реакцій годен ся похвалити чудацтвом, не числом авадь трафностьов — припадӯв, у котрых бы ся серіозно пригодили реакції 🐳🕊🌭 щи сьме не мали.
Інтересным нюансом Telegram Premium є щи можнӯсть провірити через Telegram Bot API, ци має чилядник тот абонемент — исе значит, ож ботам мож учинити функціонал автоматичного блокованя авадь ограниченя у четох чиляди без «преміума». Така форма модерації позволяє нараз удфілтрововати спамерӯв, котрі не будут тратити гроші на Telegram Premium про акаунт, котрый пак ай так буде удаленый за спам. Айбо вєдно з тым исе значит, ож мож и автоматично банити властникӯв абонемента — из сим исьме ся стріли у рӯвно єдному четї. На рокаші, котрі ся модерувут через ограниченя хосновачӯв без Telegram Premium тоже мож натрафити: такых найшли сьме дві-три штукы; в основному, модерація проходила так, ож чилядь без «преміума» не годна была писати уповісткы даякый час пӯсля припоєня ид рокашови, а про преміум-хосновачӯв такої «провіркы часом» не было.
У конклузії, смысел куповати преміум-абонемент у Telegram поку є хыба тым, тко просто хоче фінансово пӯдпоровати облюбленый месенджер тай бонусом дӯстати за вто жминю інтересных, айбо не дуже хосенных функцій.
За будучнӯсть Telegram Premium дати точну удповідь тяжко, айбо из бетаверзій аплікацій на Android, iOS тай macOS уже знаєме, ож скоро 3–12 місяцюв «преміума» мож буде дарити, а у платный функціонал додадут ся анімовані тай хосновачські емоджії. Моментално мож уповісти, ож Telegram пӯдглядує ідеї у Discord из йихньым абонементом Nitro, котрый тоже ся фокусує головно на пӯднятьови лімітӯв тай персоналізації (анімованых емоджійох, профіловых образчикох тай позадинох.
